Pentagoni synon të zvogëlojë numrin e “fuqisë së tij punëtore civile” për mbi 50,000 punonjës

Pentagoni po përpiqet të zvogëlojë numrin e fuqisë së tij punëtore civile për 50,000 deri në 60,000 punonjës përmes reduktimeve vullnetare të fuqisë punëtore.

Megjithatë, mbetet e paqartë nëse do të jetë në gjendje ta përmbushë këtë qëllim pa pasur nevojë të kryejë reduktime të detyruara në fuqinë punëtore civile, shkruajnë mediat e huaja, përcjell Telegrafi.

Departamenti i Mbrojtjes aktualisht po kryen një proces vullnetar për të arritur qëllimin e tij për një reduktim prej 5% deri në 8% të 878,000 punonjësve të tij civilë.

Ky numër i bie të jetë përafërsisht i barabartë me 50,000 deri në 60,000 punonjës, u tha gazetarëve të martën një zyrtar i lartë i mbrojtjes.

“Numri tingëllon i lartë, por unë do të fokusohesha në përqindje, një ulje prej 5% deri në 8% nuk është një drastike”, tha zyrtari, i cili shtoi se përqindja është ajo që Sekretari i Mbrojtjes, Pete Hegseth “është i bindur se mund të bëhet pa ndikuar negativisht në gatishmërinë për t’u siguruar që burimet tona ndahen në drejtimin e duhur”.

Rreth 21,000 punonjësve civilë u janë miratuar kërkesat e tyre për dorëheqje vullnetare sipas asaj që Pentagoni e quan Programi i Dorëheqjes së Shtyrë (DRP), i cili lejon punonjësit të japin dorëheqjen, por vazhdojnë të paguhen deri në fund të vitit fiskal, i cili përfundon më 30 shtator.

Zyrtari i lartë i mbrojtjes nuk pranoi të zbulonte se sa punonjës civilë në total kishin kërkuar të merrnin pjesë në Programin e Dorëheqjes së Shtyrë. /Telegrafi/