‘Pasarela’ që lidh Pallatin e Rinisë me Hotelin Grand do të vazhdohet sipas planit të viteve ’70-ta

Komuna e Prishtinës përmes Zyrës së Arkitektit të Kryeqytetit ka nisur punët në dizajnim e tenderim të disa mbikalimeve e nënkalimeve për lidhjen e lagjeve me qendrën.

Në mesin e tyre gjatë konferencës së punëve që po kryen Arkitekti i Kryeqytetit , e cila u mbajt më 07.06.2024, u përmend edhe ‘Pasarela’ mbitokësore që lidh Pallatin e Rinisë me Hotelin Grand, projekt ky që ishte në planin fillestar për ndërtimin e Pallatit të Rinisë, por që nuk është përfunduar.

Bledion Baraliu, arkitekt në ekipin e Zyrës Arkitekti i Kryeqytetit tha se tashmë janë analizuar të gjitha elementet për ecje tutje me këtë projekt.

“Grandi dhe Pallati janë në listë të mbrojtjes dhe nuk ka ndryshim që do mund të shkaktonte problem në implementim të planit origjinal për Pallatin e Rinisë, janë analizuar të gjitha këto elemente”- tha ai.

Derisa, kryetari Përparim Rama tha se nuk ka ndryshuar diçka në zonën përreth që do të pengonte vazhdimin e këtij projekti.

“Nuk ka diçka fizike që do të pengonte ndërlidhjen e Pasarelës, Pallati veçse ka nisur të restaurohet pjesërisht, i kemi disa projekte edhe me nivelin qendror. Pjesa prapa në projektin origjinal tash është e panevojshme sepse qyteti tash është zhvillu, neve tash na duhet një kampus sportiv shumë më i madh”- tha Rama.

Përfaqësuesit e Kryeqytetit kanë duke zhvilluar diskutim për projektin ‘Arkitekti i Kryeqytetit’ dhe punën që po kryhet përmes kësaj zyre.

I pari i Kryeqytetit, Përparim Rama, së bashku me drejtorët dhe stafin e projektit dhanë detaje për lehtësimet dhe punët që sipas tyre po kryen ‘Arkitekti i Kryeqytetit’.

Rama, tha se disa projekte janë në fazën e tenderimit e disa në fazën e aplikimit. Problemi kryesor në Prishtinë sipas Ramës është trafiku.

“Unë vetë me background si arkitekt urbanist e kuptoj procesin e punëve të mëdha që fillimisht zgjat pak më shumë, pastaj krijon mundësi për transformim të mirëfilltë me projekte mirë të menduara të analizuara dhe më pas implementimi është më i lehtë” – tha kryetari i Prishtinës më 07.06.2024.

“Si rezultat i punëve të tjera Kryeqyteti bashkë me organizatën e tenderëve, sot (07.06.2024) do t’i prezantojmë disa punë me vu në kontroll dhe me rrethu një vizion për Kryeqytetin. Disa janë në fazën e tenderimit, disa në fazën e aplikimit, ta tregojmë edhe nevojën e kryeqytetit për një rrëfim të së ardhmes, i duhet një rrëfim, një narrativ që na kujton të kaluarën dhe na lidh me të ardhmen. Kemi probleme me trafik, trafiku krijon dëm në ambient për shkak të ajrit të papastër, shkakton stres në aspektin shëndetësor. Projekti e tregon zgjidhjen për trafikun, projektin për kampusin e sporteve, Prishtina do jetë pjesë e lojërave mesdhetare në 2030”, – tha Rama.