Pas LDK-së dhe PDK-ja kritikon Qeverinë për normën e rritjes ekonomike: Standardi i jetesës së qytetarëve po degradon

Lidhja Demokratike e Kosovës dhe Partia Demokratike e Kosovës kanë kritikuar të shtunën Qeverinë Kurti për normën e rritjes ekonomike.

Deputetja e LDK-së, Hykmete Bajrami, përmes një postimi në Facebook ka thënë se rritja ekonomike në vend është vetëm 2.02 për qind, që sipas saj është më e ulëta ndonjëherë.

“Më 22 mars të vitit 2021, është votuar Qeveria Kurti II. Në atë kohë rritja ekonomike në vend ka qenë mbi 16 për qind, sot rritja ekonomike në vend është vetëm 2.02 për qind. Ne e dimë që në atë kohë ka qenë edhe bumi postpandemik, por situata sot është rezultat i mungesës totale të politikave ekonomike”, ka shkruar ajo.

Lexo po ashtu Deputetja e LDK-së: Rritja ekonomike 2.02 për qind në tremujorin e dytë, më e ulëta ndonjëherë

E Koordinatori i Departamentit për Financa në kuadër të Kabinetit për Qeverisje të Mirë të PDK-së, Arben Mustafa, ka thënë se kjo është norma më e ulët e rritjes ekonomike në dhjetë vitet e fundit.

“Të dhënat e publikuara nga Agjencia e Statistikave të Kosovës tregojnë se norma reale e rritjes ekonomike në tremujorin e dytë të vitit 2023 ishte vetëm 2.02 për qind – norma më e ulët e rritjes në dhjetë vitet e fundit”, ka shkruar ai në Facebook.

Mustafa tutje është shprehur se kjo normë kaq e ulët e rritjes ekonomike kryesisht reflekton kushtet e vështira nëpër të cilat po kalon sektori privat, bazuar në rënien reale të eksportit të mallrave me 10.7 për qind dhe rënien e vlerësuar reale të investimeve private me rreth 6 për qind.

“Këto të dhëna tregojnë se kah po shkon ekonomia e vendit dhe me këtë edhe standardi i jetesës së qytetarëve të Kosovës që po degradon çdo ditë e më tepër. Drejtimi që ka marrë ekonomia e vendit që nga ardhja në pushtet e Albin Kurtit ilustrohet qartë nga figura në vijim”, ka përfunduar ai. /Telegrafi/