Partitë serbe në Kosovë përgatiten për mbajtjen e zgjedhjeve të Beogradit

Edhe pse Beogradi ende nuk i ka dërguar kërkesë OSBE-së për organizimin e zgjedhjeve parlamentare në Kosovë, disa nga partitë serbe në Kosovë, tashmë kanë filluar përgatitjet për fushatën parazgjedhore.

Edhe pse Republika e Serbisë pohon se zgjedhjet e saj parlamentare do të mbahen edhe në territorin e Kosovës, në OSBE thonë se kërkesa zyrtare që duhet ta dërgojë KQZ i Serbisë, ende nuk ka arritur.

Zëdhënësi i OSBE-së në Kosovë, Senad Shaboviq, siç njofton Radiokim, thekson se ky mision është i gatshëm që në çdo mënyrë të ndihmojë në organizimin e zgjedhjeve parlamentare që i shpall Serbia, transmeton koha.net.

“Ne disa herë kemi thënë se jemi të gatshëm, që, nëse na dërgohet ftesa dhe në përputhje me modalitetet, të ndihmojmë në çdo pikëpamje”, tha Shaboviq.

Prefekti i Graçanicës, Vladeta Kostiq konsideron se nuk ka pengesa për mbajtjen e zgjedhjeve parlamentare në Kosovë. Kostiq thekson se këto zgjedhje vetëm sa do të konfirmonin legjitimitetin e pushtetit të tashëm dhe do të përforconin vazhdimin dialogut Beograd – Prishtinë.

“Ashtu si po qëndrojnë aktualisht gjërat, jam krejtësisht i sigurt se zgjedhjet do të mbahen në këto hapësira. Zgjedhjet e vitit 2012 dhe të vitit 2014 po ashtu janë organizuar e mbajtur me përkujdesjen e OSBE-së dhe nuk shoh arsye pse nuk mund të mbahen edhe në vitin 2016. Jam krejtësisht i sigurt se me organizimi të OSBE-së, zgjedhjet do të mbahen edhe në territorin e Kosovës”, ka thënë ai.

Përfaqësuesit e partive politike në Kosovë theksojnë se janë të gatshëm për fushatën parazgjedhore.

“Sa i përket fushatës, ajo do të ecën sipas marrëveshjes në centralin e partisë. Ne kemi përvojë dhe do të vazhdojmë…”, ka thënë Kostiq nga partia SNS.

Përfaqësuesi i SPS-it në Kosovë, Sasha Moraça ka shfaqur shpresën se votuesit do të dinë të zgjedhin ata që kanë punuar.

Sipas B92, në territorin Prishtinës ka gjithsej 11.500 votues. Por, zyrtarë të Beogradit shpesh herë kanë thënë se në Prishtinë nuk jetojnë as 30 serbë.