Parku Kombëtar i Blinajës në Lipjan, strehimore për 900 kafshë të egra (Video)

I ndodhur mes tre komunave, Parku Kombëtar i Blinajës gjendet në komunën e Lipjanit afër fshatit Magurë, rreth 32 km nga Prishtina dhe ka një pamje përrallore.

Bota shtazore e kësaj bukurie natyrore përbëhet nga mbi 900 kafshë të egra.

Gjithashtu në të janë ndërtuar edhe 33 liqej artificial, për t’i shërbyer faunës së kësaj zone.

I përbërë nga drunjtë e gjatë shumëngjyrësh, dhe më barin e njomë, livadhet në këtë vend për gjueti të sigurt, të japin qetësi shpirtërore.

Naim Shala ka 20 vite që përkujdeset për këtë park. Ai tregon se në këtë vend gjenden mbi 900 kafshë.

“Numri i kafshëve sillet rreth 900 krerë. 500 prej tyre janë derra ndërsa të tjerat janë tri lloje të kaprojve. Koha më e mirë për t’u parë kafshët janë muajt dhjetor-janar, për shkak të ushqimit. Fauna është shumë e pasur me tri lloje të kaprojve dhe derri i egër. Këto kafshë nuk i ka as Kroacia as Serbia e Maqedonia”, shprehet për RTV Dukagjinin Naim Shala.

Pyjet që ndodhen në këtë zonë janë të vjetra mbi 70 vite. Aty gjenden edhe disa lloje të shpezëve që kanë gjetur kushte jetese në këtë vend./Telegrafi/