PAP Testi ofrohet falas në QKMF-në e Dragashit

Komuna e Dragashit ka filluar me realizimin e PAP Testit pa pagesë në Qendrën Kryesore të Mjekësisë Familjare.

Drejtori i QKMF-së në Dragash, Endrit Piraj ka njoftuar kryetarin Bexhet Xheladini dhe kryesuesen e Kuvendit, Arijeta Skeraj, lidhur me ofrimin e këtij shërbimi falas në shëndetësinë primare.

Sipas njoftimit të Komunës së Dragashit, Xheladini dhe Skeraj kanë vizituar QKMF-së dhe janë njoftuar me shërbimet shëndetësore që ofrohen për qytetarët, raporton Telegrafi.

Në takim, Piraj ka njoftuar drejtuesit e organeve komunale se projekti i PAP Testit realizohet pa pagesë për gratë e kësaj komune, falë edhe insistimit të vazhdueshëm të Grupit të Grave Asambleiste.

“Për t’u informuar më detajisht lidhur me zbatimin e projektit të PAP Testit, Kryetari Xheladini dhe Kryesuesja Skeraj vizituan edhe gjinekologun Femi Bojaxhiu, i cili do të ofrojë këtë shërbim në QKMF, duke qenë në dispozicion të pacienteve çdo ditë pune, nga ora 09:00 – 13:00. Pacientet nuk do të kenë nevojë që të caktojnë termin paraprakisht”, thuhet në njoftimin e Komunës.

Aty theksohet se drejtuesit e organeve komunale janë informuar edhe për kujdesin paliativ, që ka për qëllim ofrimin e shërbimeve shëndetësore nëpër shtëpi për personat të cilët nuk kanë mundësi që të kenë qasje në QKMF, siç janë personat e moshuar, PAK-të, etj. /Telegrafi/