Osmani viziton kompaninë Numarics: Rikthimi i diasporës dhe investimet në Kosovë shembull për të rinjtë

Presidentja e Kosovës, Vjosa Osmani ka vizituar kompaninë fintech  ‘Numarics’ nga Zvicra, e cila tashmë është me zyrë në Kosovë, e që fokusohet në çështjet e administrimit të biznesit, me klientelë zvicerane.

Osmani gjatë vizitës së saj në një intervistë për Telegrafin ka thënë se Numarics jep shembuj inspirues për gjithë rininë e Kosovës.

Presidentja ka vënë në dukje historinë e themeluesit të Numarics, Kristian Kabashit, i cili u rikthye nga Zvicra për të investuar në Kosovë.

“Kompania Numarics jep dy shembuj shumë inspirues për gjithë rininë e Kosovës, për gjithë profesionistët të cilët duan të angazhohen në këtë fushë, dhe jo vetëm të kenë suksese individualisht por, edhe ta shtyjnë shtetin përpara. Shembulli i parë që mendoj që duhet vërtetë të frymëzojë secilin të ri e të re të mërgatës sonë është pikërisht shembulli i Kabashit, i cili është kthyer nga Zvicra për të investuar në Kosovë së bashku me shumë të rinj e të reja nga Zvicra, nga SHBA-të, të cilët kanë lënë mundësi të jashtëzakonshme që i kanë pasur në ato shtete por, kanë ardhur këtu për të krijuar vende të reja të punës dhe për të investuar në një sektor ku ofrojnë kualitet shumë të madh dhe ky kualitet është konfirmuar edhe më çmime të shumta që i kanë marr edhe brenda vendit, por edhe në Zvicër e përtej”, tha ajo.

Osmani theksoi se rinia e Kosovës është shembull brilant pasi siç u shpreh “po na e zbardhin fytyrën, jo vetëm këtu por, edhe në vendet e tjera të botës kudo që po na përfaqësojnë…”.

Ndërsa, Kristian Kabashi nga Numarics për Telegrafin tha se aktualisht janë duke ofruar shërbime për klientët në Zvicër.

I pyetur se a ka pas përkrahje në momentin që e ka hapur kompaninë në Kosovë, Kabashi tha: “Nuk është që kam pas dhe shumë përkrahje, por edhe nuk kam pas probleme që me avancu kompaninë këtu. Mendoj që vizionin që e kemi, ka bërë që shumë punëtorë të jenë pjesë e kësaj kompanie. Ju them çdo punëtori nëse ju rrini me mu këtu dhe punoni tre – katër vjet ju mund të punoni në krejt botën, pasi i mësojnë krejt rregullat e punës së jashtme”.

Ai tregoi se aktualisht në këtë kompani janë punësuar 160 punëtorë.

“Tash për tash i kemi 160 punëtor, e këtu i kemi 42. Kam mendu që duhet të rritet numri i punëtorëve shumë më shumë këtu në Kosovë, por kjo nuk po duhet tashmë. Pasi të rinjtë këtu kanë shumë më shumë potencial me ju shërbyer klientëve në Zvicër. Prej që kemi ardhur ka avancuar inteligjenca artificiale dhe nuk kemi nevojë për më shumë punëtorë”, u shpreh ai.

Kabashi nga Numarics po ashtu tha se ishte nder për të dhe kompaninë e tij vizita që ia bëri presidentja Osmani.

“Është nder i madh që e patëm presidenten për vizitë. Presidentja e përmendi se si duhet që sektori privat të bashkëpunoj me atë të shtetit…jam duke e pa që vizionin ku e ka është tamam ku duhet me qenë, që me digjitalizu Kosovën për me mujt me ju shërby jo vetëm njerëzve që janë këtu, por edhe me mujt me i ngre më shumë ata që janë jashtë me mujt me bo biznes këtu”, theksoi Kabashi. /Telegrafi/