Organizatat humanitare japin alarmin për Idomeninë

Organizatat humanitare dhe ato të ndihmave mjekësore, të cilat ndodhen në kampin e Idomenit në Greqi, deklarojnë se situata është alarmante dhe se emigrantët nuk mund të durojnë dhe shumë gjatë.

Punonjësit e këtyre organizatave shprehen se refugjatët tashmë janë në limite dhe furnizimet janë drejt fundit. Gjithçka në kamp është përmbytur për shkak të reshjeve, dhe tendat po degradojnë.

“Po mundohemi të ndihmojmë sa më shumë njerëz të jetë e mundur, por e kemi të vështirë për shkak të numrit të madh të personave që ndodhen këtu. Na duhen veshje dhe furnizime”, tha koordinatori në terren i Kryqit të Kuq, Sotiris Murudelis.

Ndërkohë që zëdhënësi i UNHCR Babar Baloch e quajti një emergjencë humanitare situatën në Greqi.

“Gjendja këtu është në fije të perit, ka një emergjencë humanitare dhe duhet të gjendet një zgjidhje. Shumë fëmijë janë të sëmurë, duhet medoemos një rrugëdalje. Emigrantët këtu nuk kanë kohë, ata janë të dëshpëruar, situata është skandaloze, duhet vëmendje e menjëhershme”, tha Baloch.

Mbi 40 për qind e refugjatëve në kampin e Idomenit janë fëmijë, ndërsa shumica vuajnë nga sëmundje të ndryshme.

Megjithatë ata refuzojë të lëvizin, me shpresën se nga çasti në çast kufiri maqedonas mund të hapet, megjithëse autoritetet në Maqedoni theksuan javën e shkuar se kufiri do të qëndrojë i mbyllur.

Rreth 1500 refugjatë braktisën kampin të hënën duke tentuar të çanin gardhin në kufi me Maqedoninë, por autoritetet maqedonase i bllokuan dhe i rikthyen sërish në Greqi.