Chelsea ka marr një fitore të madhe në udhëtim te Sevilla, duke triumfuar në fund me rezultat 4-0, falë katër golave të Olivier Giroud.
Ndeshja e xhiros së pestë e fazës së grupeve kaloi nën magjinë e francezit, duke ia siguruar Chelseat pozitën e parë në grup.
Ndeshja nis mirë për londinezët që shënuan me Giroud pas një asistimi të Kai Havertz (1-0).
Chelsea kishte edhe raste të tjera në pjesën e parë, por që nuk u kthyen në gol.
Në pjesën e dytë skuadra e Frank Lampard shënoi edhe tri herë të tjera.
Në minutën e 54-të, Mateo Kovacic asistoi për Giroud i cili nga afër mposhti portierin vendas për 2-0.
Giroud het-trikun e kompletoi në minutën e 74-të pas asistimit të Ngolo Kante.
Krejt në fund francezi shënoi edhe nga pika e bardhë për të kompletuar paraqitjen e tij fantastike në Ligën e Kampionëve.
Chelsea pas kësaj fitoreje ka 13 pikë, ndërsa Sevilla ka 10 pikë, ku të dyja e kanë siguruar kualifikimin në fazën e eliminim direkt. /Telegrafi/
