OAK përkrah taksën 100%, prodhimet vendore u rritën 30%

Oda e Afarizmit të Kosovës (OAK), organizoi konferencë për media, lidhur me Udhëzimet Administrative të cilat janë në mospërputhje me Ligjin për Minierat dhe Mineralet si dhe efektet e taksës 100%.

Hysni Zogaj anëtar i Bordit të Odës së Afarizmit të Kosovës, theksoi se sektori i minierave dhe mineraleve ka probleme të shumta në të bërit biznes.

Ai tha se problemet më të theksuara në të bërit biznes janë udhëzimet administrative që janë në kundërshtim me ligjin, siç janë taksat e dyfishta, kufizimi i koncesioneve e të tjera.

Sipas tij, këto barriera e bëjnë të pamundur zhvillimin e këtij sektori.

“Ne i kemi bërë kërkesë kryeministrit dhe ministres së Bujqësisë që këto udhëzime administrative që janë në kundërshtim me ligjin të hiqen. Përndryshe, nëse nuk hiqet bizneset do të jenë të revoltohen”, tha Zogaj.

Ai foli edhe për taksën 100 për qind ndaj Serbisë dhe Bosnjës, ku tha se kjo odë e përkrah taksën, ngaqë sektori prodhues ka rritur prodhimin 35 për qind.

Ndërsa, Burim Piraj nga kompania “Meka”, tha se taksa 100 për qind ka ndikuar në rritjen e prodhimit te bizneset vendore.

“Ne si OAK jemi për respektimin e të drejtave për treg të lirë. Por çka po na qet në pah taksa? Kompanitë patën rritje për 30 për qind”, tha Piraj. /Telegrafi/