Nuk po e gjen veten te Chelsea, Lukaku e këshillon Malang Sarr që t’i bashkohet Interit

Interi mund të ‘peshkojë’ te Chelsea në afatin kalimtar të janarit, duke tentuar të transferojë një mbrojtës.

Është fjala për Malanga Sarr, qendërmbrojtësin 22-vjeçar të skuadrës londineze, i cili mund të luajë edhe në krahun e majtë.

Francezi nuk po fiton besimin e Thomas Tuchel, i cili e ka aktivizuar vetëm një ndeshje në Ligën Premier, atë ndaj Brentfordit në transfertë.

Mediat italiane shkruajnë se lojtari me origjinë senegaleze nuk u grumbullua nga trajneri gjerman për takimin e ditës së djeshme ndaj United në kampionat dhe po mendon të gjejë një aventurë të re.

Kalimin tek Interi po e pret me padurim, teksa bëhet e ditur se Romelu Lukaku, me të cilin ka miqësi dhe të njëjtin agjent (Federico Pastorello) e ka këshilluar lojtarin defensive të transferohet te Nerazzurët.

Interi e kërkon në huazim Sarr, dhe Blutë e Londrës janë dakord me marrëveshjen që mund të arrihet në muajin që po vije.

Në akordin mes palëve pritet të përfshihet opsioni i blerjes së Sarr nga Interi në fund të sezonit për një shumë rreth 15 milion euro.

Sarr dëshiron të luajë dhe është entuziast për kalimin te kampionët e Italisë, ndërsa Inzaghi shpreson që marrëveshja finale të arrihet sa më shpejt dhe të ketë lojtarin afrikan në dispozicion të tij në muajin janar. /Telegrafi/