Nuk konstituohet Komisioni për rezervat shtetërore, Qalaj: Deputetët e pozitës po bojkotojnë çdo mbledhje

Komisioni Hetimor Parlamentar në lidhje me procedurat për furnizimin dhe menaxhimin me rezervat shtetërore, keqpërdorimet dhe abuzimet e mundshme me rezervat shtetërore nëpërmjet kualifikimit të procedurës si sekret shtetëror për furnizime të tilla nuk ka arritur të konstituohet.

Lajmin e konfirmoi për Telegrafin, deputeti i Partisë Demokratike të Kosoëvs, njëherësh kryetari i këtij Komisioni, Rashit Qalaj.

Sipas tij, deputetët e pozitës janë duke bojkotuar çdo mbledhje dhe prezencë të tyre për të mos përmbushur kuorumin e nevojshëm.

“Nuk konstituohet Komisioni, pasi deputetët e pozitës po i bojkotojnë çdo mbledhje për të mos bërë kuorumin”, ka thënë Qalaj.

Ndryshe, formimi i Komisionit Hetimor Parlamentar për rezervat shtetërore është iniciuar nga Lidhja Demokratike e Kosovës, pas dyshimeve për abuzime të mundshme.

Dy zyrtarë të Ministrisë së Industrisë, Ndërmarrësisë dhe Tregtisë, Irfan Lipovica dhe Hafiz Gara, bashkë me afaristin Ridvan Muharremi, janë arrestuar në gusht të këtij viti nën dyshimin për veprat – keqpërdorim i detyrës zyrtare, si dhe – dhënie të ndihmës në kryerjen e veprës penale të keqpërdorimit të detyrës zyrtare.

Bastisjet dhe arrestimet erdhën pas publikimit të audioincizimeve të medias ‘Nacionale’ për rezervat shtetërore.

Sipas Prokurorisë, pavarësisht se u janë paguar paratë kompanive turke e polake për grurë, vaj e sheqer, këto produkte nuk kanë ardhur në Kosovë dhe rrjedhimisht buxheti i Kosovës është dëmtuar mbi 600 mijë euro. /Telegrafi/