Nuk e arsyetoj pasurinë, shkarkohet nga detyra gjyqtari i Gjykatës së Lartë

Tom Ndreca nuk e ka kaluar Vetting-un. Gjyqtari i Gjykatës së Lartë, i njohur si relatori i Kolegjit Zgjedhor që certifikoi fitoren e Lulzim Bashës në krye të Bashkisë së Tiranës e po ashtu edhe gjyqtari i 21 janarit, rezulton se nuk justifikon 1.3 milion lekë nga pasuritë e tij.

Një shumë për të cilën Tom Ndreca ka këmbëngulur se nuk i janë llogaritur të ardhurat e tij nga viti 1980 e në vijim. Blerja e shtëpive nga gjyqtari dhe familja e tij u konsideruan të deklaruara saktë, ndërkohë që organet e vetting-ut mendojnë se harresa e djalit të gjyqtarit për të deklaruar vite më parë një automjet është fshehje.

Komisioni i Pavarur i Kualifikimit e kishte vendosur në pozitë të vështirë gjyqtarin, duke e deklaruar me figurë të papërshtatshme, përderisa kunati i tij është arrestuar vite më parë me një cigare hashash, por hetimet janë pushuar sepse ai rezultoi përdorues. Për këtë fakt, kunati i gjyqtarit konsiderohet nga KPK-ja si krim i organizuar. Një person i arrestuar për 0.44 gramë hashash konsiderohet si pjesë e krimit të organizuar, edhe pse ligji e sanksionon qartë se cilët persona janë pjesë e krimit të organizuar. /Telegrafi/