Njëri u dënua me burgim, i akuzuari tjetër në rastin “Albkings” arratiset në Serbi pas pranimit të fajësisë

Gjykata Themelore në Prishtinë, i ka shqiptuar dënim me burgim prej 21 mujave ( 1 vit e 9 muaj) dhe 5000 euro gjobë, Florent Poroshticës, njërit nga administratorët e grupit “Albkings”.

Poroshtica akuzohet për dy vepra penale “vjedhja e identiteti dhe kredencialve” dhe veprën penale “shantazhi”.

Për veprën e parë Poroshtica akuzohet se në bashkëkryerje me të pandehurën E.S me nofkën “Liderja” ka shpërndarë dhe ka lejuar shpërndarjen në grup nga ana e personave të tretë pa autorizim fotografi dhe video të ndjeshme të 12 viktimave si dhe të dhënat personale siç janë numrat e telefonave, emrat dhe mbiemrat dhe kredencialet e tjera të këtyre të dëmtuarave.

Për rastin e veprës së “shantazhit” Poroshtica akuzohet se u ka kërkuar viktimave, familjarëve apo shoqërisë së tyre mjete monetare të ndryshme për t’ua fshirë postimet denigruese me ç’rast ka përfituar vlerën monetare në shumë totale prej 2,344.44.

Lexo po ashtu Rasti "Albkings" - dënohet me 1 vit e 9 muaj burgim dhe 5 mijë euro gjobë njëri nga menaxherët e grupit

Telegrafi mëson se i akuzuari i dytë këtë rast Edin Nevzadi ka ikur në Serbi. Sipas burimeve i njëjti pasi ka pranuar fajësinë për veprën për të cilën ngarkohet ka ikur nga territori i Kosovës dhe deri tani ka qenë i pa arritshëm për organet e drejtësisë.

Nevzadi akuzohet për veprën penale të “shtrëngimit”.

Kujtojmë se ish-administratori i “Albkings”, Edin Nevzadi ishte arrestuar më 17 prill 2024. Ai u lirua nga paraburgimi në tetor 2024 pasi kishte pranuar fajësinë.

Lexo po ashtu Lirohet nga paraburgimi njëri nga ish-administratorët e “Albkings”

““Për njoftimin tuaj me datë 17.10.2024 gjykata ka pranuar nga Prokuroria Themelore në Prishtinë kërkesën për ndërprerjen e masës së paraburgimit në çështjen penale kundër të pandehurit E.N. Prokuroria e ka njoftuar gjykatën se ka ardhur në përfundim, që ndaj të pandehurit E.N kanë pushuar shkaqet për të cilat është caktuar masa e paraburgimit, pasi që i njëjti në prezencën e mbrojtësit të tij sipas autorizimit, ka arritur marrëveshjen për pranimin e fajësisë me Prokurorinë, po ashtu i pandehuri ka dhënë adresë të saktë të vendqëndrimit në Republikën e Kosovës, ku janë edhe familjarët e tij dhe ka premtuar se deri në përfundim të procedurës penale do të paraqitet çdo herë, kurdo që t’i kërkohet nga ana e Prokurorisë dhe Gjykatës”, kishin deklaruar nga gjykata.

Prokuroria Themelore në Prishtinë, më 27 janar njoftoi se ka ngritur aktakuzë ndaj F.P., E.N. dhe E.S., lidhur me rastin e grupit famëkeq, “Albkings”.

Sipas njoftimit të organit të akuzës, aktakuza në këtë rast u ngrit pas një pune të pandërprerë hetimore. /Telegrafi/