Një raketë ra rreth 10 metra larg banesës së njërit prej tyre: Njerëzit në Ukrainë përshkruajnë “momentin kur e kuptuan se ishin në një zonë lufte”

Njerëzit në Ukrainë kanë përshkruar momentin kur u zgjuan në një zonë lufte ndërsa forcat ruse bombarduan qytetet ku ata jetojnë.

Forcat ruse pushtuan Ukrainën nga toka, ajri dhe deti të enjten në mëngjes, në atë që Sekretari i Përgjithshëm i NATO-s, Jens Stoltenberg e dënoi si një “akt brutal lufte”.

Dhe siç vë në pah Business Insider, përcjell Telegrafi, njerëzit në të gjithë Ukrainën u tronditën nga gjumi nga tingujt e sirenave dhe shpërthimeve ndërsa sulmet ajrore ruse goditën kryeqytetin e vendit dhe qytete të tjera.

Dëshmitarët okularë i thanë BI se ky ishte momenti i parë kur kuptuan se një pushtim në shkallë të gjerë ishte duke u zhvilluar.

Në Kiev, kryeqytetin e Ukrainës, sulmet ajrore filluan para agimit, dhe në qytetin me 3 milionë banorë u dëgjuan zhurma shpërthimesh, të shtëna armësh dhe sirenash, raportoi Reuters.

Lexo po ashtu Reagimet e udhëheqësve botërorë ndaj pushtimit rus të Ukrainës – përfshirë edhe nga dy presidentët amerikanë

“U zgjova në pesë të mëngjesit nga tingujt e shpërthimeve. Ne të gjithë u zgjuam”, ka rrëfyer Ivanna Klympush-Tsintsadze, një anëtare e parlamentit ukrainas me Partinë e Solidaritetit Evropian, duke folur për BI nga shtëpia e saj në Kiev.

Bryan Stern nga Projekti Dynamo, një grup që ndihmon në evakuimin e qytetarëve amerikanë nga Ukraina, tha se “e gjithë dhoma e tij u dridh” kur një raketë ra pranë dhomës së tij të hotelit në qendër të Kievit.

Dëshmitarët përshkruan gjithashtu shpërthime raketash në qytete të tjera, duke përfshirë Kramatorsk, Dnipro dhe Odesa, thanë raportet.

Pak minuta pasi presidenti Vladimir Putin njoftoi një operacion ushtarak të enjten në mëngjes, raportoi The New York Times, shpërthimet ishin të dukshme në Kharkiv, qyteti i dytë më i madh i Ukrainës.

Makama Ezekial, një afrikano-jugor që jeton në Kharkiv, tha se “tingujt e përplasjes” së raketave që shpërthyen e bënë atë të hidhej nga shtrati.

Ezekial tha se ai shkoi menjëherë për të gjetur fëmijët e tij sepse kishte frikë për sigurinë e tyre.

Fëmijët e tij ishin mirë. Por Reuters raportoi se shërbimet e urgjencës thanë se një djalë u vra në Kharkiv pasi bombardimet goditën një kompleks apartamentesh.

Ndërkohë në Odesa, një qendër piktoresk turistike në jugperëndim të Ukrainës, një gazetar lokal tha se dëgjoi “afërsisht 20 raketa” të shpërthyen pranë shtëpisë së tij të enjten në mëngjes.

“Pastaj ne pamë tymin nga ballkoni”, tha Ugo Poletti, kryeredaktori i The Odessa Journal.

Autoritetet rajonale të rajonit Odesa të Ukrainës thanë se 18 persona u vranë në një sulm me raketa, raportoi Reuters, përcjell Telegrafi.

Por pavarësisht “skenarit të frikshëm”, Poletti tha se qytetarët e Odesës dukeshin “mjaft të qetë”.

Yosri Lahouar, një tunizian me banim në Ukrainë, u shqetësua gjithashtu dhe “doli nga qetësia” në Odesa.

Lexo po ashtu “Prindërit e mi jetojnë jo shumë larg nga kufiri”: Ambasadorja e Ukrainës në Irlandë shfaqet e emocionuar në një intervistë

Një raketë ra rreth 10 metra larg banesës së Lahouar. Ai kapi menjëherë çantën e shpinës dhe vrapoi në rrugë për të gjetur strehë pasi tymi e përfshiu, tha ai.

Pastaj, 10 minuta më vonë, vazhdoi ai, kishte një shpërthim tjetër aty pranë. “Isha në tokë dhe fillova të qaja”, tha ai.

Lahouar tha se reagimi i tij u dallua nga turma.

“Kur shikova përreth, të gjithë po ecnin normalisht, sikur asgjë të mos kishte ndodhur”, tha ai. “Unë kam qenë i befasuar”.

Shpërthimet, shtoi Lahouar, ishin një moment qartësie për të. Ai tha: “Në fillim isha një nga zërat që mendova se lufta nuk do të ndodhte kurrë”. Por që nga mëngjesi i sotëm, tha ai, duhej të pajtohej me faktin se jetonte në një “zonë lufte”. /Telegrafi/