Një ishull, dy strategji për tu përballur me coronavirusin – cila është e drejtë?

Vendet në të gjithë Evropën kanë strategji shumë të ndryshme kur bëhet fjalë për testimin dhe gjurmimin e rasteve të coronavirusit të ri. Dhe ishulli i Irlandës është një shembull kryesor se sa e çuditshme kjo mund të jetë.

Sipas Euronews, përcjell Telegrafi, Irlanda Veriore, e cila është e mbuluar nga Shërbimi Kombëtar i Shëndetit në Mbretërinë e Bashkuar, po këshillon njerëzit të izolohen nëse dyshojnë se janë të infektuar.

Por kompletet e testimit janë kryesisht të rezervuara për pacientët në spital dhe punonjësit e shërbimeve shëndetësore.

Ndërkohë, në jug të kufirit, Republika e Irlandës po teston njerëz shumë më gjerësisht në të gjithë komunitetin dhe përcjellë raste të coronavirusit përtej spitaleve.

“Është një çmenduri”, i tha Euronews, Gabriel Scally, presidenti i Epidemiologjisë dhe shëndetit publik në Royal Society of Medicine.

Ai po bën thirrje për krijimin e një “strategjie të të gjithë ishullit”.

Tani për tani, kufiri midis Irlandës dhe Irlandës Veriore mbetet shumë i hapur, edhe pse strategjitë e shëndetit publik nga të dy palët janë shumë të ndryshme.

“Në njërën anë të një ure, mund të thuhet se nëse keni simptoma të virusit duhet të izoloni për shtatë ditë – dhe në anën tjetër të urës, në Republikën e Irlandës, do t’ju thuhet se duhet të izoloni për 14 ditë”, shpjegoi Scally.

Numërim i ndryshëm i vdekjeve

Ka thirrje në rritje për të dy administratat për të harmonizuar përgjigjet e tyre. Javën e kaluar, ata ranë dakord në parim për të forcuar bashkëpunimin e tyre në fushën e strategjive të shëndetit publik dhe kërkimit.

Tani për tani, edhe vdekjet nga coronavirusi i ri nuk llogariten në të njëjtën mënyrë në të dy anët e kufirit, shkruan më tej Euronews.

Mbretëria e Bashkuar, përfshirë Irlandën Veriore, numëron vetëm vdekjet e COVID-19 nëse ato ndodhin në një spital dhe nëse pacienti ka dalë pozitiv për sëmundjen në 28 ditët e fundit, shpjegoi Scally.

Ndërkohë, Republika e Irlandës numëron të gjithë njerëzit që kanë vdekur dhe kanë një diagnozë të coronavirusit, qoftë brenda apo jashtë spitalit.

Kjo ka bërë që më shumë viktima të raportohen në Republikën e Irlandës, ku për shembull vdekjet në shtëpitë e përkujdesjes, për shembull, po monitorohen më mirë sesa në Mbretërinë e Bashkuar, tha Scally.

Deri më tani, të paktën 365 njerëz kanë vdekur nga COVID-19 në Irlandë, krahasuar me 124 në Irlandën Veriore.

Vlen të përmendet, megjithatë, se Irlanda ka një popullsi prej afro 5 milionë, krahasuar me rreth 1.9 milion në Irlandën Veriore. /Telegrafi/