Nga traktori te satelitët

“Sateliti i parë do lëshohet në mars. Policia do të dijë çdo gjë që ndodh në territor”, tha Kryeministri. Besoj se bëhet fjalë për muajin dhe jo planetin.

Pra, i bie që duke filluar nga marsi 2022 Policët në Republikën e Shqipërisë do punojnë nga shtëpia – stay home, stay safe – dhe vetëm kur t’i lajmërojë sateliti do dalin në rrugë.

Po sipas Kryeministrit: Satelitët do “garantojnë kontrollin e territorit për shumë gjëra, që nga kufijtë, ndërtimet, monitorimi për informacionet që duhen në luftën kundër trafiqeve, për të mbjellat e bujqësisë dhe për të luftuar krimin e organizuar”.

Pra, deri tani, pa këta dy satelitët kjo Qeveri nuk ka bërë detyrën, sepse nuk na e ka siguruar: kontrollin e territorit për shumë gjëra, që nga kufijtë, ndërtimet, monitorimi për informacionet që duhen në luftën kundër trafiqeve, për të mbjellat e bujqësisë dhe për të luftuar krimin e organizuar!

Shqipëria sot i ka mbi 28 mijë individë – policë rendi, rrugorë, bashkiakë, inspektorë të llojeve të ndryshme ndërtimorë, mjedisorë, bujqësorë; pra densiteti i mbulimit të territorit nga syri, hapat, dora e qeverisë është mjaft i lartë. Kemi më shumë se njl autoritet që të garantojë zbatimin e ligjit për kilometër katror.

Këtu as nuk po numëroj denoncuesit, spiunët e korrupsionit, të kundërvajtjes në administratë dhe jashtë saj, me dhe pa pagesë.

Pra, ne shqiptarët e ngratë mbajmë me rrogë më shumë se një polic/inspektor për kilometër katror. A është e mundur të mos dihet se çfarë ndodh në territor me këtë mbulim? Mendoj se jo. Mendoj se dihet saktësisht, por shihet nga ana tjetër, ose shihet me syrin e ortakut.

E megjithatë, na duhen satelitët, kupton apo jo? Mos ndoshta, kryeministri dhe kryetarët e bashkive do pushojnë nga puna policët e tyre? Nuk besoj.

Se për çfarë na duhen satelitët me të vërtetë do ta marrim vesh më vonë. Jam i sigurt që kjo para publike nuk po shpenzohet për t’i treguar botës ndonjë gjë si atëherë me traktorin që u fik pas dhjetë metrash, dhe as thjesht dhe vetëm për të mbajtur lart nivelin e dopaminës të ndokujt.