Nëse keni leje për armë, në Kosovë mund të bleni snajper (Video)

Pistoleta, pushkë, e madje edhe snajper mund të gjesh nëpër dyqanet e Kosovës që shesin armë.

Llojet janë të ndryshme. Përveç modelit, zgjidhje ka shumë edhe në ngjyra.

Por, për të blerë një armë të çfarë do lloji, çdo person duhet të pajiset me certifikata e leje.

E në Kosovë, numri i personave që i plotësojnë këto kushte, nuk është i vogël.

Madje me ligjin e ri të miratuar në korrik të vitit të shkuar, rregullohet edhe çështja e armëmbajtjes, njofton Klan Kosova.

Në Ministrinë e Punëve të Brendshme thonë madje se trendi i kërkesave për pajisje me armë vazhdon të rritet dita ditës.

Por sa i përket armëmbajtjes 24 orë nga personat civil, në ministri japin pak informacione.

Por, nga Zyra për informim e Policisë së Kosovës përmes postës elektronike, i thanë Klanit se vetëm në vitin 2015 janë konfiskuar 1,980 armë pa leje dhe 24,119 fishekë, përderisa në vitin 2014 ka pasur 1,318 armë të konfiskuara si dhe 37,211 fishekë.

Sa i përket armëmbajtjes, neni 11 i Ligjit për Armët përcakton se mund të bëhet vetëm në rastet e veçanta të sigurisë publike.

Trajnimet dhe pajisja me certifikata e leje merr kohë nga 1 muaj e gjysmë deri në 3 muaj.