Negociatat me Honda dështuan: Investitorët e rinj potencialë në Nissan dolën menjëherë!

Honda dhe Nissan ishin në prag të bashkimit në një kompani të madhe, por negociatat nuk dhanë rezultatin e pritur.

Dy prodhuesit e makinave njoftuan në dhjetor se po shqyrtonin mundësinë e bashkimit. Në muajin shkurt, ata duhej të paraqisnin një plan për negociatat e mëtejshme.

Qëllimi i kompanive për të bashkuar forcat shihej si një përpjekje për të mbajtur hapin me prodhuesin amerikan të automjeteve Tesla dhe kompanitë kineze në tregun e automjeteve elektrike.

Drejtori ekzekutiv i Hondës deklaroi në dhjetor se nuk bëhej fjalë për shpëtimin e Nissanit, i cili vitin e kaluar shkurtoi mijëra vende pune pas një rënieje të mprehtë të fitimeve në gjysmën e parë të vitit.

Sipas mediave lokale, negociatat dështuan sepse ideja e Hondës ishte ta shndërronte rivalin e dobësuar në një degë të saj, në vend që të krijonin një kompani të re holding siç ishte planifikuar fillimisht. Honda dhe Nissan deklarojnë se do të vazhdojnë të bashkëpunojnë në fushën e automjeteve elektrike.

Bloomberg raporton se kompania amerikane e investimeve KKR po shqyrton mundësinë e investimit në Nissan. Prodhuesi japonez po kërkon një partner të ri dhe preferon një aleat nga sektori i teknologjisë, mundësisht me seli në SHBA. KKR është tashmë i pranishëm në Japoni, përmes investimeve në furnizuesin e pjesëve të automjeteve Marelli Holdings. Përfaqësuesit e KKR dhe Nissan kanë refuzuar të komentojnë spekulimet.

Prodhuesi tajvanez i iPhone, Hon Hai Precision Industry, i njohur më mirë si Foxconn, gjithashtu është i interesuar për Nissan. Presidenti Young Liu deklaroi më herët këtë javë se Foxconn është i hapur për të blerë 36 për qind të aksioneve të prodhuesit francez të automobilave Renault në Nissan. Sipas tij, Foxconn dëshiron të hyjë në partneritet me Nissan-in, por jo ta marrë plotësisht kontrollin e prodhuesit japonez të automjeteve. /Telegrafi/