Në pesë vitet e fundit në Kosovë janë kryer 154 vrasje, prej tyre 79 të rënda

Nga viti 2016 e deri në gusht të vitit 2021, në Republikën e Kosovës kanë ndodhur 154 vrasje, prej të cilave 79 janë cilësuar si vrasje të rënda, ndërkaq 75 si vrasje.

Policia e Kosovës ka bërë të ditur për Telegrafin, se nga janari deri në gusht të këtij viti në Kosovë kanë ndodhur 19 vrasje, prej të cilave 7 janë cilësuar si vrasje, kurse 12 si vrasje të rënda.

Sipas statistikave të PK-së në vitin 2016 janë kryer 14 vrasje sipas Nenit 178 të Kodit Penal të Republikës së Kosovës.

Në të njëjtin vit pra 2016, janë kryer 16 vrasje të rënda sipas Nenit 179 Kodit Penal.

Në vitin 2017, sipas statistikave të Policisë së Kosovës ,kanë ndodhur 12 raste të vrasjes, sipas Nenit 178 të Kodit Penal të Republikës së Kosovës, ndërkaq kanë ndodhur po ashtu edhe 12 vrasje të rënda sipas Nenit 179 të këtij Kodi.

Sipas Policisë së Kosovës më së shumti raste të vrasjeve brenda këtyre pesë viteve, në bazë të Nenit 178 të Kodit Penal të RKS-së, kanë ndodhur gjatë vitit 2018, ku janë regjistruar 22 raste të cilësuara si vrasje, ndërkaq po në këtë vit kanë ndodhur 12 vrasje të rënda.

Në vitin 2019, kanë ndodhur 8 vrasje dhe 12 vrasje të rënda.

Ndërkaq, në vitin 2020 në Kosovë kanë ndodhur 15 vrasje të rënda dhe 12 vrasje.

Kurse deri në gusht të vitit 2021 në Kosovë kanë ndodhur 12 vrasje të rënda dhe 7 vrasje.

Vrasja e fundit që ka ndodhur në vendin tonë është ajo e së hënës mbrëma në qytetin e Gjilanit, ku nga arma e zjarrit mbeti i vdekur E.R, në afërsi të shtëpisë së tij në lagjen “Arbëria” të këtij qyteti.

Lexo po ashtu Vrasja në Gjilan dyshohet se ndodhi për shkak të një borxhi, prokuroria kërkon paraburgim për pesë persona

Deri më tani për këtë vrasje janë arrestuar pesë të dyshuar, për të cilët prokuroria ka kërkuar caktimin e masës së paraburgimit prej 30 ditësh. 

Më poshtë ju sjellim listën e disa prej vrasjeve që kanë tronditur Kosovën këtë vit:

Vrasja e 18-vjeçares Marigona Osmani në Ferizaj

Pasditen e së dielës, më 22 gusht 2021, para Qendrës së Emergjencës në Ferizaj, u la pa shenja jete 18-vjeçarja, Marigona Osmani, nga Dardan Krivaqa dhe Arbër Sejdiu.

Të dy u arrestuan më vonë, njëri pas disa orëve e tjetri pas dy ditëve, ndërkaq u bë e ditur më vonë se Marigona ishte torturuar dy ditë me radhë fizikisht e psiqikisht, deri në vdekje.

Lexo po ashtu Vrasja e 18 vjeçares në Ferizaj, kishte vdekur 24 orë para se të dërgohej në spital dhe kishte thyerje të gjymtyrëve

Vrasja që tronditi Kosovën e më gjerë, po hetohet nga prokurorët e Prokurorisë Themelore në Ferizaj.

Marigonës iu dha lamtumira e fundit më 24 gusht, në varrezat e Ferizajt, teksa dy të dyshuarit gjenden në paraburgim.

Mësimdhënësi vrau prindin e nxënëses në Pejë

Peja në maj të këtij i viti u trondit edhe nga një vrasje tjetër tragjike, ku mësimdhënësi kishte vrarë prindin e nxënëses së tij.

Gjithçka filloi para dy vitesh e që përfundoi me vrasje brenda një lokali në Pejë, ku i dyshuari për vrasje thuhet se kishte ngacmuar seksualisht nxënësen e tij që në atë kohë ishte vetëm 13-vjeçare.

Lexo po ashtu Detaje nga vrasja në Pejë, dyshohet se mësimdhënësi vrau babain e nxënëses së tij

Nxënësja në fjalë është e bija e të vrarit Gëzim Kastrati, i cili disa herë ishte kërcënuar nga i dyshuari.

I dyshuari për vrasjen Xhevdet Januzaj ishte arrestuar një ditë më pas nga policia.

Ish-bashkëshorti vrau gruan dhe bëri vetëvrasje në Emshir të Prishtinës

Një femër e moshës 44 vjeçare dhe një mashkull  44 vjeçar, më 13 mars rreth orës 09:00 u gjetën pa shenja jete në lagjen “Emshir”, në Prishtinë.

Policia e Kosovës kishte bërë të ditur se bëhej fjalë për vrasje dhe vetëvrasje.

Lexo po ashtu Vrasja në Emshir të Prishtinës, raporti i Policisë për rastin

Në vendin e ngjarjes është gjetur dhe konfiskuar arma e përdorur në rast, ndërsa me vendim të prokurorit trupat e pa jetë janë dërguar në IML për obduksion.

Në lidhje me këtë rast të rëndë nuk ishin bërë të ditura më shumë detaje, e as motive të vrasjes.

Motra vrau motrën në Fushë Kosovë

Një rast i rëndë i vrasjes kishte ndodhur në maj në fshatin Vragoli të Fushë Kosovës, ku një femër 33 vjeçare është gjetur e vdekur.

Lexo po ashtu Prokuroria kërkon paraburgim dhe ekzaminim psikiatrik ndaj të dyshuarës për mbytjen e motrës së saj në Fushë Kosovë

Prokuroria Themelore në Prishtinë është deklaruar në lidhje me krimin e rëndë ku kanë thënë se dyshohet se viktima është privuar nga jeta nga motra e saj.

Në lidhje me këtë vrasje, ishte kërkuar edhe ekzaminim psikiatrik i të dyshuarës, e cila ishte arrestuar nga Policia e Kosovës.

Vrasja e 26-vjeçarit në Klinë

Në qershor të këtij viti. Valentin Balaj 26-vjeçar është vrarë në Klinë. Sipas familjes së tij, dorasi është vëllai i vajzës me të cilën një nga vëllezërit ishte në lidhje dashurie për dy vite.

Zëdhënësi i Prokurorisë Themelore të Pejës, Shkodran Nikçi, kishte bërë të ditur se i dyshuari i vrasjes së 26-vjeçarit është ndaluar dhe ndaj të njëjtit do të kërkohet caktimi i masës së paraburgimit.

Lexo po ashtu Vëllai i 26-vjeçarit që u vra në Klinë: Tradhtisht e ka thirr me ia bë për hair çikën, por e ka mbytur

“Si pasojë e të shtënave me armë zjarri një person është privuar nga jeta. Trupi i pajetë i viktimës është dërguar për obdukim. Një person i dyshuar për këtë rast është arrestuar, me urdhër të prokurorit të shtetit i njëjti është ndaluar për 48 orë. Brenda afatit ligjor, ndaj të pandehurit prokurori i shtetit do të bëjë kërkesë për caktimin e masës së paraburgimit”, tha Nikçi.

Ndërsa, policia ka njoftuar se në vendin e ngjarjes janë gjetur dhe sekuestruar një revole me katër fishekë.

Babë e djalë vriten në Gradicë të Drenasit

Një ngjarje e rëndë kishte ndodhur më 5 prill në fshatin Gradicë të Drenasit ku në vend kishte mbetur i vdekur 15 vjeçari A.M, derisa i plagosur kishte mbetur babai i tij B.M. i cili vdiq më vonë si pasojë e plagëve.

Të njëjtit dyshohet se janë gjuajtur nga fqinjët e tyre (po ashtu babë dhe bir) pas një mosmarrëveshje lidhur me malin e fshatit, por motivi i saktë i ngjarjes nuk dihet akoma.

Lexo po ashtu Vdes në QKUK edhe babai i 15-vjeçarit të vrarë në Gradicë të Drenasit

Dy të dyshuarit për vrasjen dhe plagosjen në fshatin Gradicë të Drenasit gjendjen në paraburgim.

Ndërkaq Gjykata e Prishtinës ka njoftuar se u është caktuar masa e paraburgimit të pandehurve Xh. B.  dhe A. B, të cilët nga Prokuroria dyshohen se kanë kryer veprën penale të vrasjes së rëndë dhe ndihma për kryerjen e vrasjes së rëndë.

Vrasja e Albert Krasniqit nga babai i tij në Prishtinë

Kryeqyteti është tronditur edhe nga një tjetër vrasje në janar të këtij viti.

Në rrugën “Ndue Perlleshi”, nga arma e zjarrit të cilën dyshohet se shkrepi babai i tij ka mbetur i vrarë Albert Krasniqi.

Krasniqi i cili ishte biznesmen i njohur në Prishtinë, dyshohej se u vra nga babai i tij, Skender Krasniqi.

Nga Policia e Kosovës, kanë konfirmuar se lidhur me rastin është arrestuar personi i dyshuar për vrasje, ndërsa kanë konfiskuar edhe një armë që dyshohet të jetë përdorur në rast, transmeton Telegrafi.

Lexo po ashtu Avokati i babait të Albert Krasniqit: Vrasja ka ndodhur aksidentalisht - jam i bindur se do të konfirmohet mbrojtja e Skenderit

Për vrasjen e Albert Krasniqit kanë reaguar edhe shumë artistë, kjo pasi që Krasniqi kohë më parë ishte anëtari i labelit, Babastars.

Krasniqi ishte bërë i njohur për publikun edhe për martesën e tij me ish-miss Kosova, Besa Gashi, martesë kjo e cila raportohet të ketë përfunduar para disa ditësh. Krasniqi dhe Gashi nga martesa e tyre kanë një vajzë. /Telegrafi/