Ndeshja ndaj Jordanisë, testi i fundit i Shqipërisë para Izraelit

Nga ora 20:00 në “Elbasan Arena”, trajneri i Kombëtares së Shqipërisë, Christian Panucci, pret të marrë disa përgjigje shumë të rëndësishme nga futbollistët kuqezi, për t’i pasur më pas idetë e qarta për sfidën e të dielës që mbetet shumë e rëndësishme për objektivin e Kombëtares në Ligën e Kombeve, vendin e parë në grup.

Stërvitjen e fundit, para testit ndaj Jordanisë, Panucci ka preferuar të mos e zhvillojë, siç ndodh tradicionalisht, në stadiumin ku luhet sfida.

Theksi në dy seancat e vetme është vënë në përgatitjen tekniko-taktike. Do të ketë disa emra të rinj në formacion, por edhe rikthime veteranësh, që në ndeshjet e fundit nuk kanë gjetur hapësira edhe për shkak të minutave të pakta në këmbë, transmeton SuperSport.

Rikthehet në krahun e majtë të mbrojtjes Ermir Lenjani, i cili vetëm pak ditë më parë gjeti golin me Sionin në Superligën e Zvicrës, po kështu edhe Mërgim Mavraj, që i jep siguri prapavijës, duke formuar dyshen e qendrës me shumë mundësi me Gjimshitin.

Lexo po ashtu Lajmet për Kombëtaren e Shqipërisë

Talenti Vrioni, që luan me Venezian, do të ketë minutat e tij, po ashtu edhe emrat e tjerë, sepse me Jordaninë, ndryshimet gjatë lojës pritet të jenë të shumta.

Panucci kërkon maksimumin në çdo futbollist, për të vendosur më pas për njëmbëdhjetëshin që do të zbresë në fushë ne Beer Sheva ndaj Izraelit.

Kërkohet imponim në lojë dhe rezultat, sepse nuk ka më kohë për eksperimente.

Ndaj Izraelit kuqezinjtë duhet të jenë moralin dhe përgatitjen e duhur për të synuar një tjetër sukses, që në sfidën e fundin me Skocinë në Shqipëri, të luhet për vendin e parë.