Narko-mbretëresha meksikane që ishte fshehur prapa petkut të nënës së përkryer, kush është në fakt gruaja e El Chapos

Gruaja e narko-bosit meksikan Joaquin Guzman i njohur si El Chapo, është arrestuar në Shtetet e Bashkuara nën dyshimin se edhe vetë ka kontrabanduar drogë.

Emma Coronel Aispuro, 31-vjeçe, është kapur në aeroportin ndërkombëtar Dalls. Ajo akuzohet për pjesëmarrje në shpërndarjen e kokainës, amfetaminës, heroinës dhe marihuanës, transmeton Telegrafi.

Coronel si vajzë ka marrë pjesë në garën për Miss gjatë vitit 2006, gjithashtu ka fituar në Miss në qytetin Kanelas në shtetin Durango.

Siç raporton Deutsche Welle, autoritetet meksikane supozojnë se ajo asokohe tashmë ishte përfshirë në tregtimin në lëndë narkotike.

Kështu nuk është për t’u çuditur që si 17-vjeçare është njohur “me burrin e ëndrrave të saj”. Guzman i njohur me nofkën El Chapo (i vogli), asokohe ka qenë në krye të kartelit famëkeq Sinaloa.

Pavarësisht dallimit në vite (El Chapo është 32 vite më i vjetër) ka qenë një dashuri në shikim të parë.

“Nuk më ka bërë për vete me dhurata, por më mënyrën se si është sjellë me mua”, ka thënë Coronel gjatë një interviste.

E në ditëlindjen e saj të 18-të, çifti i lumtur u martuan në kishë, e kjo ishte martesa e katërt e El Chapos.

Pas martesës, Coronel bëri një jetë relativisht normale dhe studionte për gazetari në Universitetin e Sinaloas. Por më 2011 shkoi në Kaliforni, ku solli në jetë binjakët.

Megjithatë, emri i babait në certifikatat e lindjes nuk figuronte fare. Është e kuptueshme, sepse autoritetet amerikane tashmë kishin lëshuar urdhër arrest për arrestimin e El Chapos – madje kishin ofruar një shpërblim prej pesë milionë dollarë për çfarëdo informacioni që do të ndihmonte në kapjen e tij.

E vetë Coronel thotë se rrallë herë takohet me bashkëshortin dhe atë në raste të caktuara. Në opinion mohonte akuzat se nuk e dinte se çfarë pune bën bashkëshorti i saj, dhe se kurrë nuk e kishte parë me armë në dorë.

Por policia amerikane nuk pajtohet me këto informacione: gruaja e re e njohur mirë me sistemin e kontrabandimit të drogës, e në disa raste ka bërë tregti me kokainë, heroinë e marihuanë duke i transportuar matanë kufirit.

Përveç kësaj, për Coronelin besojnë hetuesit se është e përfshirë në organizimin e arratisjet se bashkëshortit nga një burg në Meksikë gjatë vitit 2015. Arratisja ishte kryer në stilin e filmave aksion të Hollywoodit: El Chapo është arratisur nga dritarja e tualetit, përmes një tuneli prej 1.6 kilometrave – në fund të cilit e priste një motoçikletë.

Coronel ishte përkujdesur për formimin e ekipit që do të asistonte në arratisjen e bashkëshortit. Vazhdimisht i kishte bërë presion autoriteteve meksikane që bashkëshortit të saj t’i miratojnë disa benefite.

Shikuar nga jashtë, ajo bën një jetë modeste familjare, përjashto ekseset siç ishte ai me zbukurime Barbie prej 20 mijë dollarëve me rastin e ditëlindjes së binjakeve. Në vitin 2019 kishte pasuar shoku: gjykata e Nju Jokrut bashkëshortin e saj e dënoi me burgim të përjetshëm pa mundësi kërkesë për lirim.

El Chapo akuzohet për vrasjen e tremijë njerëzve, ku rrallë herë kishte hezituar të urdhërojë ekzekutimin e rivalëve. Madje në gjykatë, ku Coronel ishte dëshmitare në ditën e gjykimit dhe nga distanca i dërgonte puthje partnerit, kishte pranuar më në fund se e dinte me çfarë punë merrej bashkëshorti.

E derisa El Chapo është në burg, bashkëshortja e tij është shndërruar në influencere dhe mbush rrjetet sociale me fotografi me luks të pafund. Por, tani ajo është në burg. /Telegrafi/