MTI përkrah zhvillimin e sektorit privat

Sfidat me të cilat përballen bizneset gjatë të bërit biznes, përfitimet që dalin nga Marrëveshja për Stabilizim Asociim dhe angazhimi që kërkohet nga institucionet dhe vetë bizneset në këtë drejtim dhe mbështetja e Ministrisë së Tregtisë dhe Industrisë për zgjerimin e kapaciteteve prodhuese në veçanti, ishin disa nga temat që u diskutuan gjatë një takimi të anëtarëve të Odës Ekonomike Amerikane në Kosovë me Ministren e Tregtisë dhe Industrisë, Hykmete Barjami.

Ministrja Bajrami theksoi rolin dhe kontributin e bizneseve në rritjen e punësimit dhe zhvillimit ekonomik të vendit, duke shtuar se pavarësisht buxhetit modest që ka në dispozicion kjo Ministri, janë bërë përpjekje të shumta që të avokohet tek të gjitha institucionet lokale dhe qendrore për përmirësimin e vazhdueshëm të ambientit të të bërit biznes në vend. Ajo njoftoi që me vendim të Kryeministrit në bazë të kërkesës të dalë nga Këshilli Kombëtar për Zhvillim Ekonomik është themeluar një task forcë e cila po punon në këtë drejtim, e që do të mundësojë koordinimin e këtij procesi edhe në nivel ndërministror.

Sa i përket MSA-së, e cila tanimë ka filluar të implementohet, Ministrja Bajrami tha se jemi në kërkim të mbështetjes së donatorëve për grante dhe certifikimin e produkteve me standarde ndërkombëtare të kualitetit, ku mendohet të përfshihen kompanitë prodhuese dhe ato shërbyese.

Drejtori Ekzekutiv i Odës Amerikane, Aria Zeka, e cilësoi si shumë të rëndësishëm rolin e Ministrisë së Tregtisë dhe Industrisë e cila prek shumë prej proceseve të punës së bizneseve, përfshirë fushën e importit dhe prodhimit, konkurrencës si dhe rolin ndërlidhës me afaristë të jashtëm dhe investitorë potencialë.

Ai gjithashtu shprehu mirënjohjen e tij edhe për punën e Ministres Bajrami dhe rolin përkrahës ndaj bizneseve dhe përmirësimin e mjedisit të të bërit biznes, duke kërkuar që të merren në konsideratë edhe rekomandimet dhe çështjet e tjera me të cilat përballen bizneset që operojnë në Kosovë.

Në anën tjetër, Michael Gold, anëtar i Bordit të Guvernatorëve të Odës Amerikane tha se përkushtimi dhe këmbëngulja për të bërë ndryshime në drejtim të përkrahjes së zhvillimit të sektorit privat, rritjes së punësimit dhe zhvillimit ekonomik të vendit, përfshirë edhe përmirësimin e bilancit tregtar, janë vetëm disa nga rezultatet e punës së vazhdueshme të kësaj Ministrie. Ai përmendi edhe Fondin për Garanci Kreditore, duke njoftuar të pranishmit që ky projekt është shumë afër fillimit të lëshimit të garancioneve për bizneset, proces ky që do të mundësojë qasje më të lehtë në financa për të gjitha bizneset që operojnë në Kosovë.

Gjatë diskutimit me Ministren Bajrami, bizneset prodhuese theksuan nevojën e mbështetjes institucionale në aspektin e fuqizimit të ekonomisë së tregut, standardizimit dhe eksportimit të produkteve të Kosovës, dhe rrjedhimisht shfrytëzimin më të mirë të përparësive të ofruara nga Marrëveshja për Stabilizim dhe Asociim. /Telegrafi/