Momenti kur Edi Rama u përkulet shqiptarëve në Greqi

Në një fjalim të mbajtur në Athinë, kryeministri i Shqipërisë, Edi Rama, mori një qëndrim të rrallë publik duke kërkuar ndjesë për gabimet e mundshme gjatë mandatit të tij 10-vjeçar.

Rama, i cili ishte në vizitë zyrtare në Greqi, shfrytëzoi mundësinë për të theksuar angazhimin e tij ndaj shqiptarëve dhe për të bërë çdo gjë transparente në sytë e qytetarëve që i kanë besuar atij qeverisjen e vendit.

“Shumë të dashur miq, motra dhe vëllezër, rrofshi që më nderuat kaq shumë. Unë nuk kam si ta hap zemrën dhe trurin tim që ju të hyni dhe të shihni vetë ç’ka brenda, por nuk iki dot sot pa u thënë edhe disa fjalë,” tha Rama me një ton reflektues.

Ai pranoi se, pavarësisht përpjekjeve për të udhëhequr me dinjitet dhe integritet, të gjithë bëjnë gabime, dhe ai nuk është përjashtim.

“Gabime unë mund të kem bërë plot deri këtu në këto 10 vite. I kërkoj ndjesë për çdo gabim, por kurrë në asnjë rast nuk i kam tradhtuar ata që ma kanë besuar qoftë edhe njëherë me votën e tyre këtë nder të jashtëzakonshëm,” shtoi ai, duke u shprehur më tej për përkushtimin e tij ndaj interesave të vendit dhe të qytetarëve të tij.

Në një akt simbolik të falënderimit dhe respektit, Rama u ul në gjunjë para emigrantëve shqiptarë pas përfundimit të takimit me ta, një imazh që padyshim do të mbetet në mendjet e të pranishmëve.

Bashkëshortja e tij, Linda Rama, ndau një moment të ngrohtë duke i dhuruar atij një përqafim.

Ky veprim i kryeministrit shqiptar në Athinë shpërfaq një ton të ndershëm dhe të hapur, duke lënë të kuptohet se ai vlerëson besimin që qytetarët i kanë dhënë dhe është i gatshëm të marrë përgjegjësi për çdo veprim të tij si lider i Shqipërisë./Telegrafi/

Videon mund ta shikoni KËTU.