“Më mirë të vdesësh në këmbë sesa të jetosh në gjunjë!”: Kështu mendon udhëheqësi i vendit që po refuzon të mbyllet për të parandaluar coronavirusin

Ndërsa zyrtarët nga Montreali deri në Moskë kanë vendosur popullsinë nën një formë bllokimi të krijuar për të ngadalësuar përhapjen e coronavirusit, një njeri vazhdon të qëndrojë i fortë me idenë se pjesa tjetër e botës ka “humbur mendjen”: ai është presidenti bjellorus Alexander Lukashenko.

“Është më mirë të vdesësh në këmbë sesa të jetosh në gjunjë!”, i ka thënë Lukashenko një reportereje të televizionit bjellorusi të shtunën kur u pyet nëse coronavirusi mund ta ndalojë atë të vazhdonte të luante hokej, përcjell Telegrafi.

“Mua? Pse? Nuk e kuptoj. Këtu nuk ka asnjë virus”, ka thënë Lukashenko, duke bërë lëvizje rreth arenës. “Ky është një frigorifer, është gjëja më e mirë për shëndetin tuaj. Sporti, veçanërisht në akull, është më i mirë se çdo ilaç antiviral. Është gjëja e vërtetë”.

Lukashenko, një nga udhëheqësit me shërbimin më të gjatë në ish-Bashkimin Sovjetik, ka qenë në pushtet për mbi 25 vjet.

Lukashenko për javë të tëra ka minimizuar kërcënimin e COVID-19.

Në vend që ta përgatisë kombin e tij për më të keqen, ai ka hedhur në dyshim në mënyrë rutinore dhe të hapur reagimin e botës ndaj virusit, duke përdorur fjalën “psikozë” për të përshkruar reagimin global disa herë që nga fillimi i marsit.

Madje, ai ka mbajtur të hapura fabrikat, dyqanet, ngjarjet kulturore dhe sportive.

Ministria Bjelloruse e Shëndetësisë ka raportuar vetëm 152 raste të coronavirusit ndërsa Rusia fqinje raportoi 1.836 që nga e hëna.

Dy javë më parë, ai këmbënguli se Bjellorusia ka mbijetuar edhe situata më të këqija sesa pandemia e coronavirusit që goditi botën.

Sauna, vodka dhe tendat në fusha janë ilaçi më i mirë për ata që kanë frikë nga përhapja e virusit, tha ai. /Telegrafi/