Sport Futboll Kosovë

“Më mirë të më shajnë nënën, sesa të këndojnë “Serbi, Serbi”” – Llullaku shpjegon për mediat rumune se pse lojtarët e Kosovës vendosën të largohen

Para 2 muajve

Azdren Llullaku, ish-golashënuesi më i mirë i Superligës së Rumanisë në sezonin 2016/17, komentoi ngjarjet në ndeshjen Rumani – Kosovë, e cila u ndërpre në kohën shtesë kur rezultati ishte 0-0.

Në kohën shtesë, kapiteni i Kosovës, Amir Rrahmani, u bëri thirrje bashkëlojtarëve të tij të largohen nga fusha, pas thirrjeve anti – Kosovë që vinin nga tribunat.

Llullaku ka shpjeguar për Fanatik.ro arsyet pse ekipi ynë vendosi të largohen nga fusha duke mos kthyer nga dhoma e zhveshjes.

Aktualisht sulmuesi që luan në Rumani te klubi Gloria Bistrița, ka treguar se lojtarëve të Kosovës nuk iu intereson aspak rezultati i ndeshjes.

Futbollisti i ardhur për herë të parë në Rumani në vitin 2012, në Gaz Metan Mediaș, ka shpjeguar se sa e vështirë është për një futbollist kosovar të dëgjojë thirrje që lidhen me Serbinë.

Madje, Llullaku u ka rrëfyer rumunëve se ka vuajtur shumë nga ky konflikt. Shtëpia e tij u dogj, duke arritur të shpëtojë me vështirësi nga lufta.

“Jam i sigurt se do të ishin larguar nga fusha edhe sikur të ishte 3-0 për Kosovën! E pashë ndeshjen në TV. Më vjen keq që ndodhi kështu. Me sa di unë, lojtarët ishin të vendosur të largoheshin nga fusha në thirrjet e para të tifozëve rumunë, lidhur me emrin e Serbisë”.

“Jam 100% i bindur se nuk e bënë këtë për të marrë tre pikët nga komisionet e UEFA-s. Është thjesht shumë dhimbje. E kuptoni se ne kosovarët kemi kaluar luftën. Kemi familjarë të vdekur në luftë. Unë kam ikur nga andej, pashë gjithçka”.

“Është një plagë që nuk është mbyllur, nuk do të harrohet. Më besoni, kur dëgjoni thirrjen “Serbi, Serbia” është shumë, shumë e dhimbshme. Dhe që të mos ndodhte më, morën këtë vendim për t’u larguar nga fusha”, deklaroi Llullaku.

Tutje, ai iu ka dhënë edhe shembuj se si ndjehen njerëzit në Kosovë kur në një stadium dëgjohen thirrje të tilla.

“Me sa dëgjova Amir Rrahmanin, ai tha se i gjithë stadiumi thërriste ‘Serbi! Serbia!”. Nëse do të bërtisnin katër ose pesë, nuk do të ishte problem. Por kur një stadium i tërë këndon, nuk është në rregull”.

“Për ne kosovarët kjo brohoritje është shumë e dhimbshme. Më mirë shaj nënën time, nëse do.

Po jap një shembull, që të kuptohet se çfarë ndjejmë kur këndohet diçka e tillë. Nëse në ndeshjen me Palestinën thërrasin “Izrael! Izrael!’, si mendon se ndihen lojtarët palestinezë, kur kanë mijëra fëmijë të vdekur, shtëpi të bombarduara? Po ju them se është e dhimbshme, sepse e kam kaluar”.

“Personalisht kur kam ikur nga lufta më është djegur shtëpia. Na bombarduan nga pas, djathtas dhe majtas, ne gjetëm një rrugë, për të vrapuar nëpër male, drejt në Mal të Zi. Ke parë vetëm fatkeqësi, shtëpi të djegura, njerëz të vdekur. Është shumë e vështirë për disa që ta kuptojnë, sepse për fat nuk e kanë kaluar luftën”, nënvizoi Llullaku.

Tutje, sulmuesi që vjen nga Istogu, ka deklaruar se lojtarëve të Kosovës nuk iu ka interesuar rezultati i ndeshjes dhe të njëjtën gjë do ta bënin edhe nëse do të ishin duke fituar.

“Askush nuk do të më besoj, jam i sigurt, por e vë dorën në zjarr, sepse e di mentalitetin e popullit kosovar. E përsëris, nuk bëhej fjalë për largim nga fusha për tre pikë në “tavolinë”. Kështu mendonin se duhej të reagonin”, përfundoi Llullaku.

Për fundi ai nënvizoi se e di që Rumania do t’i marrë tri pikët, por nuk beson që Kosova do të përjashtohet nga gara që organizohen nga UEFA dhe FIFA. /Telegrafi/