Daichi Kamada nuk do t'i bashkohet Milanit edhe pse palët kishin një marrëveshje mes tyre.
Mesfushori japonez do të jetë futbollist i lirë pasi më 30 qershor i skadon kontrata me Eintracht Frankfurtin dhe është i lirë të bisedoj me skuadrat e interesuara.
Megjithatë Rossonerët kanë ndërruar objektiv dhe Kamada nuk është më i preferuari për mesfushën.
Kësisoj Roma, Napoli, Borussia Dortmund, Manchester United dhe Atletico Madrid kanë rikthyer interesimin për japonezin.
Agjentët e futbollistit gjatë ditëve të ardhshme pritet të kenë takime me drejtuesit e klubeve që kanë shprehur interesim për Kamadan.
26-vjeçari kërkon një kontratë katër vjeçare me pagë vjetore prej tre milionë eurove neto në sezon.
Kamada ka pasur paraqitje fantastike me Frankfurtin vitin e fundit, ku në 47 ndeshje zyrtare ka realizuar 16 gola dhe ka asistuar në shtatë të tjerë. /Telegrafi/
