Mickoski për hyrjen e ASH-së në qeveri: Çdo parti vendos vet, populli do të vendos ditën e zgjedhjeve

“Është sekret publik që po negociohet për të hyrë në qeveri dhe nuk është diçka që nuk na habit, flitet prej javësh. Por kam thënë se çdo parti politike ka vendimmarrjen e vet autonome dhe autoktone”, thotë kryetari i OBRM-PDUKM-së, Hristijan Mickoski, pasi mediat sot kanë raportuar për takimin e Arben Taravarit, ushtrues detyre i kryetarit të Aleancës për Shqiptarët dhe Dimitar Kovaçevskit për hyrjen e mundshme të Aleancës në qeveri.

Për komentin se partitë e vetme politike në opozitë do të mbeten OBRM-PDUKM, BESA dhe E Majta, Mickoski tha se ky është mesazh i mjaftueshëm për qytetarët se si të veprojnë për zgjedhjet e ardhshme parlamentare, duke theksuar se pret politikat e qeverisë të shkatërrohen nga njerëzit.

“Ky është një mesazh i mjaftueshëm për qytetarët se si të veprojnë për zgjedhjet e ardhshme parlamentare. Nëse e keni LSDM-në si faktor pakicë në qeveri që do të bëjë gjithçka për të qëndruar një ditë më shumë që të kalojnë disa tendera privatisht, që të vjedhin më shumë, që të gëzojnë më shumë privilegje dhe të krijojnë parazitë të tillë për të cilat publikohet këto ditë, atëherë i vetmi sovran që e pengon, përveç neve politikanëve në opozitë, është populli. Dhe në zgjedhjet e ardhshme parlamentare pres që të shkatërrohen politikat e kësaj qeverie të udhëhequr nga LSDM-ja”, theksoi ai.

Mickoski konsideron se nëse Aleanca për Shqiptarët bëhet pjesë e qeverisë së LSDM-së dhe BDI-së, atëherë është një devijim i plotë politik nga tezat që janë thënë në periudhën e kaluar, duke theksuar se nëse një politikan e akuzon qeverinë se ka punuar gabim, me korrupsion dhe kriminalisht, dhe më vonë bëhet pjesë e saj, atëherë do të thotë legjitimimi i të gjitha politikave të gabuara dhe e vetmja gjë që ju interesonte është sigurimi i një karrige apo funksioni.

“Nëse më kërkoni mendimin tim për hyrjen eventuale të Aleancës për Shqiptarët në qeveri, do të thotë një devijim i plotë politik nga të gjitha ato teza që janë thënë vitet e kaluara. Ndryshe është thelbi, nëse thua se kjo qeveri po punon gabim, nëse thua se kjo qeveri ka fajin që shumë shqiptarë u larguan nga vendi, nëse thua se kjo qeveri është kriminale dhe e korruptuar dhe nuk ekziston dhe pastaj hyn në atë qeveri, pastaj që i legjitimon ato politika, pranon me vete se ke gënjyer, dmth nuk ke thënë të vërtetën dhe e vetmja gjë që të intereson është të rrëmbesh një lloj funksioni dhe karrige”, tha Mickoski.

Mickoski beson se arsyeja do të mbizotërojë te Taravari dhe Aleanca për Shqiptarët, por çfarëdo që të vendosin për hyrjen eventuale të LSDM-së dhe BDI-së në qeveri, do të jetë vendim i tyre.