Michael B. Jordan shkaktoi surprizën më të madhe të mbrëmjes në Actor Awards 2026, duke mposhtur Timothee Chalamet për çmimin e Aktorit më të Mirë në Rol Kryesor.
Fitorja e tij u konsiderua e papritur, pasi Chalamet kishte triumfuar më herët në Critics Choice Awards dhe Golden Globe Awards.
Ylli 39-vjeçar mbeti i përlotur dhe i habitur teksa mori trofeun, ndërsa Chalamet u ngrit në këmbë për ta duartrokitur, së bashku me Gwyneth Paltrow, shkruan DailyMail.
Në momentin e shpalljes, nëna e aktorit, Donna Jordan, u pa e emocionuar dhe e tronditur nga gëzimi.
Në fjalimin e tij, Jordan falënderoi nënën me fjalë prekëse: “Mami, faleminderit që më çoje me makinë vajtje-ardhje për në New York, kur nuk kishim para të mjaftueshme për të kaluar nëpër Tunelin Holland”.
Ai shtoi: “Nuk e prisja këtë. Jam shumë i nderuar që jam i nominuar me aktorë që i dua dhe admiroj”.
Triumfi nuk u ndal me kaq. Filmi horror “Sinners”, i shkruar dhe drejtuar nga Ryan Coogler, fitoi edhe çmimin për Ansamblin më të Mirë, duke lënë pas “Frankenstein”, “Hamnet”, “Marty Supreme” dhe “One Battle After Another”. /Telegrafi/
