Messi flet pas thyerjes së rekordit të Peles: Kurrë nuk e ka menduar se do të thyej ndonjë rekord

Lionel Messi arriti të thyente rekordin e Peles për më së shumti gola për një klub të vetëm, në fitoren ndaj Real Valladolidit, duke realizuar golin e 644-të në karrierë.

Ylli argjentinasi javën e kaluar barazoi rekordin e legjendës braziliane në 643 gola, derisa të martën mbrëma rrëmbeu pozitën e parë.

Për këtë të arritur, 33-vjeçari e ka pranuar se asnjëherë nuk e kishte menduar se do të thyente ndonjë rekord në karrierën e tij.

“Kur fillova të luaja futboll, asnjëherë nuk kam menduar se do të arrija të thyeja ndonjë rekord”, ka thënë Messi pasi theu rekordin e Peles.

“Unë vetëm mund të falënderoj të gjithë bashkëlojtarë që më kanë ndihmuar ndër vite, familjen time dhe shokët e mi që më kanë mbështetur çdo ditë”.

“Është një gjë e jashtëzakonshme për të arritur këto gjëra dhe natyrisht se më kanë bërë të punoj më fort, por sërish them se kjo është meritë edhe e bashkëlojtarëve”, ka shtuar më tej gjashtë herë fituesi i Topit të Artë.

Pele kishte shënuar 643 gola për Santosin gjatë karrierës së tij, derisa Messi tani ka një më shumë se ai, duke bërë që të vendos rekord historik. /Telegrafi/