Messi është i pandalshëm, e thotë ish-trajneri i Realit

Carlo Ancelotti beson se do të ishte e pamundur të ndalej Lionel Messi, nëse superylli i Barcelonës është në formën e tij më të mirë fizike.

Argjentinasi gjatë muajit janar fitoi çmimin Topi i Artë dhe këtë sezon ka realizuar 35 gola për t’i mbajtur Blaugranët në rrugën drejt mbrojtjes së tripletës.

Ish-trajneri i Real Madridit ka folur për tentimet për ta ndalur argjentinasin magjik.

“Markimi i Messit është i komplikuar. Mbrojtësi që e ruan atë duhet të jetë në nivelin më të lartë. Mënyra më e mirë për ta ndalur atë është që të mbrohesh si ekip duke mbajtur hapësirën me të dhe të mos ia mundësoni që ta prekë topin”.

“Ju nevojiten shumë lojtarë në mesfushë për ta bërë këtë. Kjo humb opsionet e Messit dhe ai do të ketë më pak topin. Por, problemi është se Barcelona ka më shumë armë sesa Messi. Nëse përqendroheni te Messi, sulmuesit tjerë mund të shkaktojnë probleme”.

“Nëse Messi është në 100 për qindëshin e tij fizikisht, është e pamundur ta ndalni, nuk ka rëndësi se kush është trajner apo si është strategjia e tij”, ka deklaruar italiani për Sina Sports.