Mbahet takimi ndërgjegjësues për luftimin e dhunës në familje – Komuna e Gjilanit mbështet gratë viktima

Në takimin e organizuar nga Qendra për Mbrojtjen dhe Rehabilitimin e Grave dhe Fëmijëve “Liria” në Gjilan, u theksua rëndësia e bashkëpunimit ndërinstitucional dhe mbështetjes së shoqërisë civile për të luftuar dhunën në familje dhe për të mbështetur viktimat.

Koordinatorja e strehimores “Liria”, Ibadete Mustafa, tha se gratë e mbijetuara kanë nevojë për mbështetje psiko-sociale dhe fuqizim ekonomik për të rimëkëmbur jetën e tyre.

Ajo theksoi se shumë gra hezitojnë të raportojnë dhunën për shkak të stigmatizimit dhe mungesës së mbështetjes së duhur.

Leonora Morina-Bunjaku, nënkryetare e Komunës së Gjilanit, nënvizoi rëndësinë e parandalimit të dhunës me bazë gjinore, duke theksuar se bashkëpunimi ndërmjet institucioneve dhe komunitetit mund të sjellë ndryshime pozitive.

Ajo u zotua për mbështetje të vazhdueshme për viktimat dhe ftoi për angazhime më të mëdha në këtë drejtim.

Nga ana e saj, Linditë Salihu, zyrtare për barazi gjinore, u shpreh se barazia gjinore fillon në familje dhe ndikon në ndërtimin e një shoqërie të drejtë e të harmonishme.

Salihe Aliu, përfaqësuese nga Drejtoria për Shëndetësi dhe Mirëqenie Sociale, përshkroi shërbimet e ndryshme që komuna ofron për viktimat e dhunës, duke përfshirë strehimin, ndihmat financiare dhe shërbimet mjekësore.

Nga Prokuroria e Shtetit, Gani Leci, udhëheqës i zyrës për mbrojtjen e viktimave, ndau shqetësimin për rritjen e rasteve të dhunës në familje, duke theksuar faktorët kryesorë si papunësia dhe varësitë.

Sadulla Salihu, nga Agjencia për Ndihmë Juridike Falas, bëri të ditur se viktimat e dhunës përfitojnë ndihmë juridike pa kritere, si një mënyrë për t’u dhënë mbështetje të menjëhershme.

Në fund të takimit, pjesëmarrësit theksuan se vetëm me përkushtim të përbashkët dhe ndërgjegjësim shoqëror mund të arrihet parandalimi efektiv i dhunës dhe rehabilitimi i viktimave. /Telegrafi/