Në Prishtinë është zhvilluar një ceremoni përkujtimore kushtuar ish-të burgosurve politikë shqiptarë në ish Jugosllavi, duke u shënuar edhe botimi i vëllimit të parë të leksikonit “Shtigje të lirisë: Leksikon i të burgosurve politikë shqiptarë në Jugosllavi, 1944-1953”.
Kryetari i Komunës së Prishtinës, Përparim Rama, në fjalën e tij tha se ky botim është një dëshmi e rrallë e qëndresës shqiptare.
Rama, gjithashtu tha se Komuna do të krijojë një program në shkolla e qendra kulturore, që të rinjtë e vendit të dinë historinë se sa vështirë ka qenë për të arritur lirinë.
“Një dëshmi e çmuar e rezistencës, qëndresës dhe aspiratës të pathyeshme për liri dhe për dinjitet kombëtar. Ky libër përmbledh rreth treqind biografi,e që synon me përfshi dhjetëra vëllime dhe libra biografi. Është një dokument arkivol një themel për një histori që duhet të evidentohet, të rrëfehet e mos të humbas asnjëherë nga kujtesa jonë kolektive.
Dokumentet që i evidentojnë afro nëntëqind persona që kanë përjetuar dënime politike me ekzekutime me varre të pashënuara me humbje që ende mbeten për t'u hetuar dhe detajuar. me aq sa mundemi dhe të paktën këtu në kryeqytet mbështetje me program edukativ,në mënyrë që këto histori të shpalosen në shkolla e qendra kulturore, ashtu që brezat e ri të dijnë sa i vështirë ishte rrugëtimi drejt lirisë së kombit tonë”, tha Rama.
Edhe kryetari i Shoqatës së Ish-të Burgosurve Politikë, Shefik Sadiku, theksoi rëndësinë e ruajtjes së kujtesës historike të popullit shqiptar.
“Burgosjet politike që kanë ndodhur gjatë shekullit të kaluar shumica prej tyre që i ka burgosur pushteti jugosllav numri i madh i tyre janë te gjykuar dhe të dënuar me pushkatim. Për ne është shumë e rëndësishme ta ruajmë kujtesën historike të popullit shqiptar sakrifica e cila ka qenë jo individuale por për interes nacional”, tha Sadiku.
Ndërkaq studiuesi ,Mark Palnikaj, i cili ka kontribuar në përgatitjen e këtij botimi, u shpreh se për të kontributi për Kosovën është një mision i përhershëm.
“Komuna ka vlerësuar një kontribut të vogël që kam bë me kërkimet e mia në arkiv. Nëse bëhem 100 vjeç do të jap kontribut për Kosovën. Por, unë e jap fjalën se sa të jem në qoftë se bëj njëqind vjet do vazhdojë të jap kontribut për Kosovën, sepse Kosova meriton çdo lloj kontributi nga çdo shqiptar nga Mitrovica deri në Çamëri, nga Shkupi deri në Vlorë”, shtoi Palnikaj.
Gjithashtu Rama ka nderuar disa nga ish të burgosurit politik që ishin prezent me mirënjohje për kontributin e tyre.
