Mayweather në bisedime për t’u përballur me dyshen e UFC-së, McGregor dhe Khabib… në të njëjtën ditë

Floyd Mayweather është në bisedime për të zhvilluar meçe kundër Conor McGregor dhe Khabib Nurmagomedov, ka thënë xhaxhai i tij, Jeff Mayweather (i cili ka qenë po ashtu boksier dhe kampion në kategorinë shumë të lehtë në IBO).

Boksieri amerikan ka vendosur sërish të dalë nga pensioni, ndërsa presidenti i UFC-së, Dana White, është parë në shoqërinë e tij në muajt e fundit.

Kampioni i pamposhtur u ndesh me McGregorin në gusht të vitit 2017 me rregulla të boksit dhe fitoi, ndërkaq vazhdimisht është përfolur për një duel të mundshëm me kampionin aktual në UFC, Khabib Nurmagomedov.

Në një prononcim të fundit, 42-vjeçari kishte thënë se do të ishte i gatshëm që të përballej me dy yjet e MMA në të njëjtën ditë. Ndërsa sipas Jeff, boksieri është duke biseduar që të përballet me ta, njëri pas tjetrit.

Lexo po ashtu Mayweather befason të gjithë, paralajmëron përballjen me McGregorin dhe Nurmagomedovin brenda këtij viti

“Floyd është duke biseduar për mundësinë e përballjes me McGregor dhe Khabib në të njëjtën ditë, gjë që mund ta realizojë me lehtësi. Tashmë janë zhvilluar bisedime në mes të Floydit dhe Dana White për arritjen e marrëveshjes ”, ka thënë Jeff për VegasInsider.com.

Edhe pse Mayweather nuk është në formën e tij më të mirë dhe është në një moshë të caktuar, xhaxhai i tij beson se ai ka energji të mjaftueshme për të triumfuar edhe ndaj Conorit dhe ndaj Nurmagomedovit.

“Floydi nuk është më në kulmin e formës së tij, mirëpo do t’i mposhtë që të dy. Ai mund t’i mposhtë ata, njërin pas tjetrit, brenda ditës, brenda natës – nuk ka rëndësi, ata nuk do të kishin kurrfarë shansi, është e lehtë për të”.

“Ai ka thënë njërin gjatë ditës dhe njërin gjatë mbrëmjes, do të jetë diçka që nuk ka ndodhur kurrë më parë. Pagesë e dyfishtë për të shikuar, e shtrenjtë për t’u blerë”, ka shtuar Jeff Mayweather.

Nëse ndodh evenimenti historik, atëherë sipas xhaxhait të tij, Floyd do ta përfundonte shumë shpejt duelin ndaj McGregor pa spektakël duke e ditur se e ka edhe një tjetër duel më vonë ndaj Khabibit. /Telegrafi/