Masat ndëshkuese të BE-së, Selmanaj: Janë bllokuar miliona euro për projektet kapitale të nivelit qendror dhe lokal

Deputeti i Lidhjes Demokratike të Kosovës (LDK), Driton Selmanaj ka thënë se janë bërë dy muaj prej kur Bashkimi Evropian i ka vendosur masa ndëshkuese vendit tonë.

Selmanaj duke renditur pasojat që i erdhën Kosovës nga ndëshkimi i BE-së, thotë se për këtë periudhë janë bllokuar miliona euro për projekte kapitale të nivelit qendror dhe atij lokal.

“Dita e 60 apo 2 muaj, që kur bota demokratike i vendosi sanksione shtetit tonë. Janë bllokuar miliona euro për projekte kapitale të nivelit qendror, janë bllokuar miliona euro për projekte kapitale për nivelin lokal dhe janë bllokuar miliona euro për projektet për ndërmarrjet publike”, shkruan Selmanaj në Facebook.

Sipas tij, me këto masa, apo siç i quan ai sanksione, vendi është sjellë në këtë gjendje nga ta që kanë mendësi komuniste, totalitare dhe jo-demokratike.

“Janë bllokuar njohjet dhe anëtarësimet në organizatat ndërkombëtare dhe janë bllokuar vizitat e bartësve të institucioneve publike në shtetet demokratike dhe institucionet ndërkombëtare. Në këtë gjendje e sjellë vendin e vet vetëm një mendësi qeverisëse komuniste, totalitare dhe jo-demokratike”, ka përfunduar ai.

Bashkimi Evropian më 1 korrik kishte njoftuar se kanë hyrë në fuqi masat ndëshkuese të vendosura ndaj Kosovës.

Lexo po ashtu BE-ja nuk tregon nëse do t’i largoj masat ndëshkuese të vendosura ndaj Kosovës – këtë javë pritet takim në Bruksel

Masat që po zbaton BE-ja ndaj Kosovës përfshijnë pezullimin e përkohshëm të punës së trupave të krijuara në bazë të Marrëveshjes së Stabilizim-Asociimit (MSA), mosftesën e Kosovës në takime të nivelit të lartë dhe pezullimin e vizitave dypalëshe, përveç atyre që përqendrohen në adresimin e krizës në veri të Kosovës në kuadër të kornizës së dialogut të lehtësuar nga BE-ja.

Gjithashtu, masat tjera përfshijnë edhe ndaljen e programimit të fondeve për Kosovën nga IPA 2024 (Instrumentet e Para-Anëtarësimit) si dhe propozimet e Kosovës në kuadër të Kornizës së Investimeve në Ballkanin Perëndimor nuk janë dorëzuar për shqyrtim nga Bordi më 29 dhe 30 qershor. /Telegrafi/