Mariupoli “ndoshta vendi më vdekjeprurës në Ukrainë”

Të paktën 1,348 civilë u vranë gjatë betejës së Mariupolit, duke përfshirë 70 fëmijë, tha të enjten një zyrtar i lartë i Kombeve të Bashkuara.

Por “numri aktual i vdekjeve të civilëve ka të ngjarë të jetë mijëra më i lartë”, ka thënë Komisionerja e Lartë e OKB-së për të Drejtat e Njeriut, Michelle Bachelet, shkruan CNN, përcjell Telegrafi.

“Këto vdekje u shkaktuan nga sulmet ajrore, bombardimet me tanke dhe artileri dhe armë të lehta gjatë luftimeve në rrugë”.

Rreth 90% e ndërtesave të banimit janë dëmtuar ose shkatërruar në qytetin jugor, tha Bachelet.

Ajo e quajti Mariupolin “vendin më vdekjeprurës në Ukrainë” që nga fillimi i luftës deri në prill.

Veç këtyre, trupat janë gjetur në varre të improvizuara individuale ose kolektive në oborre, rrugë dhe parqe, në shtëpi dhe apartamente pa mbikëqyrje.

“Shumë janë ende për t’u varrosur”, tha ajo.

Kështu, Bachelet shtoi se për momentin është “e pamundur të dihet” numri i saktë i vdekjeve.

“Derisa të zbulohen dhe identifikohen të gjithë trupat e pajetë, si dhe statusi i tyre, qoftë ushtarak apo civil, si dhe shkaqet e sakta të vdekjes, do të jetë e pamundur të dihet një numër i saktë i vdekjeve të civilëve të shkaktuara drejtpërdrejt nga armiqësitë dhe ato të shkaktuara nga mungesa e ushqimit, ujit, kujdesit mjekësor dhe efekteve të tjera të jetesës”, ka shtuar më tej ajo. /Telegrafi/