Maqedonia dhe Kosova nënshkruajnë memorandum për bashkëpunim në sektorin energjetik

Ministri i Ekonomisë së Maqedonisë Kreshnik Bekteshi, sot ka realizuar takim me ministrin e Zhvillimit Ekonomik të Kosovës, Valdrin Lluka, me të cilin kanë diskutuar për bashkëpunimin e mundshëm mes dy ministrive.

Bekteshi në takim ka thënë se gjatë periudhës së ardhshme projekti aktual për realizim nga ana e të dy shteteve është lidhja e sistemeve elektro-energjetike mes dy vendeve, duke shtuar se kjo do të jetë edhe një lidhje shtesë me sistemet elektro-energjetike të BE-së, pasi siç tha, Kosova përmes Shqipërisë do të lidhet me Italinë, njofton Telegrafi Maqedoni.

“Gjithashtu nga ana jonë së shpejti do të publikohet tenderi ndërkombëtar për ndarjen e premive për energji elektrike të prodhuar nga termocentralet fotovoltaike, që do të thotë përmes tenderit do të jepet e drejta për prodhim të energjisë elektrike nga burime të ripërtërishme”, tha Bekteshi.

Ndërsa ministri Valdrin Lluka shprehu interes për projektin për gazifikim, pasi sipas tij, hapet mundësi për zhvillimin e këtij rrjeti në të dy shtetet.

“Përgatitja e projekteve të përbashkëta do të na mundësojë prezantim të përbashkët para institucioneve financiare të huaja, me qëllim angazhimin e mjeteve për realizimin e projekteve të përbashkëta”, tha Lluka.

Bekteshi dhe Lluka në takim kanë diskutuar edhe për autostradën Shkup-Bllacë, përgatitjet për pjesën Tetovë-Jazhincë, si dhe Opajë-Stanishiq.

Pas përfundimit të takimit të punës mes dy delegacioneve, ministrat Bekteshi dhe Lluka nënshkruan Memorandumin për mirëkuptim në sektorin energjetik mes dy ministrive, me të cilin pritet të intensifikohet bashkëpunimi dypalësh në sektorin energjetik./Telegrafi/