Lajme Kosovë

Kosova zyrtarisht aplikon për anëtarësim në Bashkimin Evropian

Para 2 vitesh

Tre liderët shtetërorë të Kosovës kanë nënshkruar aplikimin për anëtarësim të Kosovës në Bashkimin Evropian.

Në një ceremoni zyrtare, nënshkrimin e dokumentit të aplikimit, e kanë bërë presidentja e Republikës së Kosovës, Vjosa Osmani Sadriu, Kryetari i Kuvendit, Glauk Konjufca dhe Kryeministri, Albin Kurti.

Krerët e shtetit pas ceremonisë do të japin edhe deklaratë për media.

Kosova muaj më parë ka aplikuar për tu bërë pjesë edhe e Këshillit të Evropës. /Telegrafi/

4 poste

Listo sipas

14/12/2022 12:07

Statusi i vendit kandidat në BE, Kryeziu tregon skenarët dhe gabimet që nuk duhet t’i bëjë Kosova

Njohësi i çështjeve të integrimeve evropiane, Taulant Kryeziu, ka dhënë disa sqarime pasi Kosova zyrtarisht nënshkroi aplikimin për anëtarësim në Bashkimin Evropian.

Sipas tij, procesi i integrimit në BE mund të ndahet në dy pjesë: asocimi me BE-në dhe anëtarësimi në BE.

“Asocimi përfshin pjesën e negocimit dhe zbatimit të Marrëveshjes së Stabilizim Asociimit (MSA). Ndërsa, anëtarësimi përfshin marrjen e statusit të vendit kandidat, negociatat e anëtarësimit deri te anëtarësimi formal në BE”, ka shkruar ai në Facebook.

“Procesi i asocimit mes Kosovës dhe BE-së është përmbyllur me Marrëveshjen e Stabilizim Asociimit. Procesi i anëtarësimi në BE do të filloj me aplikimin për anëtarësim në Bashkimin Evropian dhe marrjen e statusit të kandidatit. Kjo do të shënoj fillimin e një rrugëtimi të gjatë për tu bërë vend Anëtarë i BE-së”.

14/12/2022 11:33

Kurti: Aplikimin për anëtarësim do t’ia dorëzojmë presidencës çeke të BE-së në Pragë

Kryeministri i Kosovës, Albin Kurti pas nënshkrimit të aplikimit për anëtarësim në Bashkimin Evropian, ka thënë se ky është një moment historik për Kosovën.

“Bazuar në aspiratat dhe përkushtimin e pathyeshëm të popullit tonë për paqe, liri, barazi dhe drejtësi, orientimin tonë të qartë evropian e euroatlantik dhe konsensusin shoqëror e politik se e ardhmja e vendit tonë është brenda BE-së, sot po bëjmë hapin e parë drejt anëtarësimit në organizatën më të madhe të paqes dhe prosperitetit në Evropë”, ka thënë Kurti.

Kurti ka bërë të ditur se aplikimi do t’i dorëzohet Presidencës Çeke të BE-së në Pragë.

“Aplikimi në BE i nënshkruar sot nga krerët e Republikës tonë, do t’ia dorëzojmë presidencës çeke të Këshillit të BE-së në Pragë. Ky është moment historik për vendin tonë që synon hapjen e një kapitulli të ri për shtetin dhe shoqërinë tonë”, ka thënë Kurti.

14/12/2022 11:21

Osmani: Sot është ditë historike për vendin

Presidentja e vendit, Vjosa Osmani tha sot se është ditë historike për vendin, është moment historik aplikimi i Kosovës për anëtarësim në Bashkimin Evropian.

“14 dhjetori ka rëndësi të dyfishtë për historinë e Kosovës. Në njërën anë po aplikojmë për anëtarësim në Bashkimin Evropian dhe në anën tjetër po shënojmë përvjetorin e themelimit të ushtrisë sonë. Dy akte që shkojnë në drejtim të realizimit të vizionit tonë, integrimit euro-atlantik”, tha ajo.

Presidentja Osmani tha se ky është një hap vendimtar drejt jetësimit të ëndrrës kolektive dhe ambicies sonë të patjetërsueshme.

14/12/2022 11:15

Kosova zyrtarisht nënshkruan aplikimin për anëtarësim në Bashkimin Evropian

Presidentja e Kosovës, Vjosa Osmani së bashku me kryeministrin Albin Kurti dhe kryeparlamentarin Glauk Konjufca, kanë nënshkruar aplikimin për anëtarësim në Bashkimin Evropian.

Nënshkrimi i saj u bë në një ceremoni zyrtare të organizuar në ambientet e Presidencës së Kosovës.

Kryeministri Albin Kurti gjatë ditës së djeshme bëri të ditur se gjatë kësaj jave do të dorëzojnë zyrtarisht aplikimin për anëtarësim në Bashkimin Evropian.

Kryeministri shtoi se ka ardhur koha që statusin potencial për kandidatë që na është njohur shumë kohë më parë, ta kthejmë zyrtarisht në status kandidat duke kaluar në një fazë të re të marrëdhënieve me BE-në.