“Ligji i ri për mediat nuk është kufizues”

Propozim-teksti për ndryshime në ligjin për shërbime audio dhe audio-vizuale nuk përmban masa kufizuese në pjesën politike ose mënyrën se si të informojnë mediat, kështu thekson zëdhënësi i Qeverisë, Mile Boshnjakovski i pyetur lidhur me deklaratat e shoqatës së gazetarëve se qeveria dëshiron që të luajë rolin e kryeredaktorit të mediave.

Zëdhënësi Boshnjakovski ka thënë se debati publik për ligjin është i hapur.

“Debati për ndryshimet e ligjit për shërbime audio dhe audio-vizuale është i hapur dhe të hënën më 20 nëntor do të mbahet debati i parë nga palët e involvuara në këtë proces, qëllimi kryesorë i këtyre ndryshimeve është që të mundësohet profesionalizimi dhe departizimi i agjencisë së audio dhe shërbimeve vizuele si dhe të RTVM”, ka thënë Boshnjakovski.

Lidhur me ndryshimet në ligjin për media kryetari i shoqatës së gazetarëve, Naser Selmani tha se në vend të përmirësimit të tekstit të ligjit ai po përkeqësohet dhe se për ato është e papranueshme ideja që qeveria të rregullojë përmbajtjen mediale sepse është kundër praktikave demokratike europiane, duke shtuar se vendosja e dënimit me pagesë për mënyrën e informimit të gazetarëve tregon qartë se Qeveria dëshiron të luajë rolin e kryeredaktorit në media./Telegrafi/