Lenjani nuk i përgjigjet ftesës me vonesë të Panuccit: Me lot në sy do të them ‘jo’ sa të jesh ti aty

Ermir Lanjani ka qenë ndër vite njëri ndër lojtarët më të mirë të kombëtares shqiptare dhe ndër më meritorët që Shqipëria luajti në ‘Euro 2016’.

Por prej ardhjes së Christian Panuccit, futbollisti i Sionit është injoruar tërësisht.

Ai nuk ka luajtur asnjë minutë në Ligën e Kombeve, ndërsa Panucci e ka ftuar vetëm pasi janë lënduar tre lojtarë së fundmi.

“Që nga viti 2013 jam pjesë e Kombëtares shqiptare dhe ndihem krenar për këtë gjë. Saherë jam ftuar e kam pranuar ftesën me dëshirën më të madhe pasi çdo herë kur e kam veshur fanellën kuq e zi e kam veshur me shumë dashuri”.

“Kam qenë gati gjithmonë, kam sakrifikuar shumë, jam gjakosur, kam qarë e kam qeshur si futbollist i Shqipërisë”.

Lexo po ashtu Ftohen lojtarët pa minuta në këmbë, ndërsa injorohet Lenjani – Panuccin si duket nuk e kanë bindur tre golat dhe shtatë asistimet e Ermirit

“Kam pranuar edhe stolin, por jam respektuar gjithmonë. Tani në dy vitet e fundit jam duke kaluar nëpër një formë shumë të mirë, por po injorohem nga trajneri momental i Kombëtares. Nuk kam luajtur asnjë minutë në Ligën e Kombeve, por nuk kam bërë zhurmë dhe kam vazhduar të punoj edhe më fort”.

“Kur lëndohen 4-5 lojtarë trajnerit i bie në mend që luan dikund Ermir Lenjani dhe më dërgon ftesë”.

“Faleminderit, por JO. Me lot në sy e them se nuk do të grumbullohem më me Kombëtaren sa të jesh ti aty. Kam kontribuar shumë dhe meritoj respekt. Dashuria ime për Shqipërinë është më e madhe se urrejtja jote për mua”.

“Unë kam qenë, jam dhe gjithmonë do të jem djalë i Shqipërisë, ndërsa ti je vetëm kalimtar”, ka shkruar Lenjani në rrjetet sociale. /Telegrafi/