Legjenda e Munchen 1860 përkrahë Valdet Ramës

Një prej emrave më të mëdhenj të skuadrës Munchen 1860 kritikon trajnerin aktual të skuadrës së dytë bavareze, Benno Mohlmann për mosaktivizimin e sulmuesit shqiptar, Valdet Rama.

Në një intervistë dhënë për mediat gjermane, ish kapiteni i viteve 60, Lowe Peter Grosser ndalet gjatë te çështja e sulmuesit shqiptar, duke ngritur pikëpyetje të mëdha.

“Nën drejtimin e Benno Mohlmann, Valdet Rama luan vërtet shumë pak dhe të gjithë po pyesin se përse po ndodh një gjë e tillë”, thekson Grosser, sipas të cilit, 23-vjeçari gjerman Nico Karger është emri i preferuar i teknikut aktual.

“Jam shumë i habitur pasi Valdet Rama është një nga lojtarët më të mirë që Munchen 1860 ka në organikë. E kujtoj shumë mirë momentin e parë që ai erdhi në Gjermani. Në ndeshjet e para ai tregoi aftësi të mëdha teknike dhe me triblimet e tij në sulm e ndihmoi skuadrën të qëndronte në Bundesliga 2. Për mua është e pakuptueshme se si një lojtar i tillë mund të qëndrojë në stol”, thekson legjenda e klubit bavarez.

Në fund të intervistës dhënë për faqen Dieblaue24.com, ai shtoi se Rama është një lojtar që mund t’i vendosë ndeshjet edhe i vetëm, prandaj Mohlmann bën mirë të mbështetet te aftësitë e shqiptarit për të arritur objektivin e mbijetesës.