Të martën është marrë vendim nga Qeveria e Kosovës për shfuqizimin e vendimit që ndalonte organizimet që përfshinin tubime të shumta në njerëz.
Duke qenë se për këtë ngjarje edhe u protestua javën e kaluar nga këngëtarët dhe pronarët e restoranteve, institucionet vendosën që të marrin vendim për lejimin e organizimeve të tilla si ahengjet dhe dasmat, por nën masa të caktuara të cilat do të bëhen të ditura gjatë ditëve në vazhdim.
“Nga nesër, do të bëjmë një udhëzues, edhe do të jetë publik për të gjithë. Bashkë edhe me Ministrinë e Shëndetësisë, në grupin punues në kuadër të kësaj ministrie ku edhe ne bëjmë pjesë do ta publikojmë këtë udhëzues dhe besoj se nga data 01.07.2020 do të filloj edhe organizimi i dasmave”, ka thënë Ministri i Industrisë, Vesel Krasniqi në një prononcim për Telegrafin lidhur me këtë çështje.
Ndërkohë, lidhur me këtë vendim kanë nisur reagimet e para nga këngëtarët, shumë prej të cilëve janë shprehur të lumtur që kërkesa e tyre e bërë gjatë protestës së 15 qershorit, është marrë parasysh.
Këngëtari dhe ish-deputeti, Labinot Tahiri, përmes një statusi në rrjetin social e ka quajtur “Bingo” shfuqizimin e këtij vendimi, teksa thotë se një vendim i tillë i ka hapur edhe më shumë dyer rreth organizimit të aktiviteteve tjera humanitare.
Ky është postimi i tij i plotë (pa ndërhyrje):Dasmat sërish në vazhdimsi! Urime dasmorë! Kur bën mirë , gjen mirë! Respekte për të gjithë juve dhe Zoti na ndihmoftë të gjithêve. Pasi sêrish u lejuan dasmat apo mbrëmjet rinore e familjare , u jam mirënjohës atyre që protestuan me ne dhe kolegun tim Afrim Muqiqin i cili ka qenë shumë i angazhuar! Po ashtu falenderim për ministrin Zemaj, për zv kryeministrin Besnik Tahirin dhe shoqatës së hotelierêve të Kosovês e të tjerë! Nëse prap ka ndonjë ndryshim negativ lidhur me vendimin në fjalë, prap nga qeveria e mirëpres sepse shteti është mbi të gjitha. Hapja fillon me datë 01.07.2020 BINGOOOOOO VAZHDOJMË ME DONACIONE SOT VEQ FILLUAM NDERTIMIN PËR VETERANIN E UÇK-SË NË DRENAS. Labi-FKSH". /Telegrafi/
