LDK-ja vazhdon me Abdixhikun kryetar

31/01/2026 19:51- Abdixhiku pas votëbesimit: Prodhuam demokraci maksimale

Kryetari i Lidhjes Demokratike të Kosovës (LDK), Lumir Abdixhiku, i ka mbijetuar votëbesimit të kërkuar nga vetë ai të shtunën, në Kuvendin e partisë, duke u konfirmuar me shumicë votash për të vazhduar udhëheqjen e LDK-së.

Pas përfundimit të procesit, Abdixhiku ka bërë të ditur se Kuvendi ka zhvilluar mbi shtatë orë diskutime, ndërsa qëndrimin e tij në krye të partisë e ka cilësuar si privilegj dhe përgjegjësi.

“Me votim të mbyllur u dha verdikti i anëtarësisë së LDK-së, për të cilin jam falënderues. Jam mirënjohës për mbështetjen e vazhdueshme, por edhe për kundërshtimet gjatë këtij procesi”, ka deklaruar Abdixhiku para mediave.

31/01/2026 19:51- Çfarë tha Hykmete Bajrami pasi "shpëtoi" Abdixhiku

Pas procesit të votimit dhe mbështetjes së Lumir Abdixhikut nga Kuvendi i LDK-së për të qëndruar në pozitën e kryetarit të kësaj partie, është deklaruar anëtarja e këtij subjekti politik, Hykmete Bajrami.

Ajo para gazetarëve tha se do ta respekton vendimin e Kuvendit, i cili votoi kundër dorëheqjes së Lumir Abdixhikut.

“E kam thënë edhe më herët, po e përsërisë prapë, LDK është më e madhe se secili prej nesh, respektoj vendimin e Kuvendit të LDK-së", tha ajo shkurt.

31/01/2026 19:50- Lushaku-Sadriu: LDK miratoi dy deklarata politike për reformim dhe zhvillimet në vend

Jehona Lushaku-Sadriu është deklaruar pas mbledhjes së Kuvendit të Lidhjes Demokratike të Kosovës (LDK), ku shumica e anëtarëve nuk e kanë pranuar dorëheqjen e Lumir Abdixhikut nga pozita e kryetarit të partisë.

Ajo ka bërë të ditur se Abdixhiku ka paraqitur dy deklarata politike, njëra që parasheh reformimin e brendshëm të LDK-së, dhe tjetra që përfshin qëndrimet e partisë ndaj zhvillimeve politike në vend, të cilat, sipas saj, janë miratuar me shumicë votash në Kuvend.

“Kryetari i LDK-së, Abdixhiku, për herë të parë e ka provuar votëbesimin si rezultat i rezultatit të zgjedhjeve dhe me shumicë votash është konfirmuar sërish si kryetar i LDK-së. Ai ka paraqitur edhe dy deklarata politike, një që parasheh reformimin e brendshëm të partisë dhe një që paraqet qëndrimet e LDK-së për zhvillimet politike në vend, dhe të dyja janë miratuar me shumicë votash në Kuvend”, ka deklaruar Lushaku-Sadriu.

31/01/2026 19:03- Çfarë tha Abdixhiku para delegatëve pas votimit?

Kreu i LDK-së, Lumir Abdixhiku kërkoi nga delegatët e pranishëm që të bashkohen për ta ringritur këtë parti.

KosovaPress raporton se pas votimit, ai mbajti një fjalim, ku mes tjerash u tha "në këtë mes nuk ka as humbës e as fitues".

Ai falënderoi delegatët të cilët përmes votimit te fshehtë, kundërshtuan me 164 vota kundër dorëheqjen e tij.

Ndërkaq, pro dorëheqjes kanë votuar 136 delegatë.

31/01/2026 18:35- LDK-ja vazhdon me Abdixhikun kryetar

Ka përfunduar procesi i votimit të fshehtë në Kuvendin e Lidhjes Demokratike të Kosovës.

Të gjithë delegatët e pranishëm në Kuvend kanë votuar në mënyrë të fshehtë për ofrimin e dorëheqjes së Lumir Abdixhikut.

Burimet e Telegrafit bëjnë me dije se rreth 55% kanë votuar pro kryetarit aktual të LDK-së, Lumir Abdixhiku.

31/01/2026 17:58- LDK përfundon votimin pro ose kundër dorëheqjes së Lumir Abdixhikut

Përfundon procesi i votimit pro ose kundër dorëheqjes së Lumir Abdixhikut.

Telegrafi mëson se tashmë ka filluar numërimi i votave.

Raportohet se vet Lumir Abdixhiku u deklarua para delegatëve se nuk do të marrë pjesë në votim.

31/01/2026 17:32- Nis votimi i fshehtë, “A e pranoni dorëheqjen e Lumir Abdixhikut - Po, Jo”

Pas tri orësh diskutime në Kuvendin e Përgjithshëm të LDK-së ka nisur procesi i votimit të fshehtë për ta pranuar ose jo dorëheqjen e kryetarit aktual të kësaj partie, Lumir Abdixhiku.

302 delegatë janë prezent për votim për apo kundër dorëheqjes së Abdixhikut.

Derisa delegatëve iu është prezantuar letra për votim: “A e pranoni dorëheqjen e Lumir Abdixhikut - Po, Jo.”

31/01/2026 16:51- Rukiqi: S’ka parti më demokratike se LDK as në Kosovë as në rajon

31/01/2026 16:41- Votim i fshehtë në LDK për dorëheqjen e kryetarit Lumir Abdixhiku

Kuvendi i Lidhjes Demokratike të Kosovës (LDK) ka vendosur që çështja e ofrimit të dorëheqjes së kryetarit Lumir Abdixhiku të procedohet përmes votimit të fshehtë.

Pas këtij vendimi, Kuvendi ka miratuar edhe hapat për procedimin dhe organizimin e procesit të votimit, duke ia lënë përfundimisht delegatëve vendimin për fatin e udhëheqjes së partisë.

31/01/2026 15:46- Vazhdon punimet Kuvendi i LDK-së, a do të mbetet Abdixhiku në krye të partisë?

Kuvendi i Lidhjes Demokratike të Kosovës po vazhdon punimet, ndërsa pas fjalimit të kryetarit Lumir Abdixhiku është hapur debat për zhvillimet në parti.

Abdixhiku para se të niste punimet Kuvendi i LDK-së theksoi se do të dëshironte që kjo ditë të shënohet me maturitet politik, me diskutime dhe debate të hapura.

“I siguroj të gjithë anëtarësinë e LDK-së se nga kjo ditë do të dalim edhe më të unifikuar, më të fortë, edhe më të gatshëm për të ardhmen e mirë që na pret përpara”, tha ai.

Abdixhiku tha se me debat, me diskutime dhe në fund me shumicë votash e përcaktojnë fatin politik.

Ai tutje tha Kuvendi është organi më i lartë i partisë dhe ka të drejtë të vendos çdo gjë.

31/01/2026 14:03- Kuvendi i LDK-së vazhdon punimet me dyer të mbyllura

Pas fjalimit të kryetarit të LDK-së, Lumir Abdixhiku i cili foli rreth 1 ore para delegatëve të LDK-së, Kuvendi i kësaj partie po vazhdon punimet me dyer të mbyllura.

Abdixhiku në fund të fjalimit tha se drejtimin e punimeve të Kuvendit ia kalon Kryesisë së Punës, duke thënë se procesi duhet të jetë i pavarur nga çdo ndikim individual.

“...Prandaj, nga ky moment, i kaloj punimet tek Kryesia e Punës e këtij Kuvendi. Këto punime duhet të jenë të pavarura nga çfarëdo ndikimi individual. Dhe, sikurse në mars të vitit 2021, kur ju më dhatë privilegjin më të madh jetësor, të ju prijë, do të ulem sërish si njëri nga 355 delegatët e kësaj shtëpie të madhe të demokracisë që e desha pa kusht. Nga ky moment, vendimmarrës jeni ju! Zoti e bekoftë Lidhjen Demokratike të Kosovës. Zoti e bekoftë popullin e Kosovës. Zoti e bekoftë Republikën tonë...”, deklaroi Abdixhiku.

31/01/2026 12:53- Abdixhiku para delegatëve: Rezultatet e fundit nuk erdhën nga një gabim i vetëm, por si pasojë e një grumbullimi të sfidave gjatë kohës

Kryetari i Lidhjes Demokratike të Kosovës (LDK), Lumir Abdixhiku, ka mbajtur një fjalim gjatë Kuvendit të punës së partisë, duke iu drejtuar delegatëve dhe duke folur për përgjegjësinë, sfidat dhe rolin e LDK-së në politikën e Kosovës.

Abdixhiku tha se partia ka përgjegjësi historike dhe se është koha që të japë përgjigje edhe për vetveten.

“Heshtja në jetën politike është një barrë e rëndë. Njeriu e kupton që ka momente që duhet të ndalet, jo pse është i dobët, por sepse ka përgjigje për të dhënë nga ata që e besuan. Nata e zgjedhjeve ishte një prej atyre momenteve që nuk ishte vetëm një rezultat politik, por një pasqyrë e përgjegjësisë”, tha ai.

Kryetari i LDK-së theksoi se përgjegjësia merret vetëm brenda Kuvendit të partisë dhe vendimmarrja i takon delegatëve.

“Kam zgjedhur të dal para jush jo sepse është e lehtë, por sepse është e domosdoshme. Njeriu nuk matet vetëm kur gjithçka shkon mirë, por edhe kur gjuha i dridhet pak”, shtoi ai.

Abdixhiku vuri në dukje se rezultatet e fundit nuk erdhën nga një gabim i vetëm, por si pasojë e një grumbullimi të sfidave gjatë kohës, duke theksuar nevojën për të reflektuar dhe për t’u përballur me realitetin.

“Sot jemi këtu për t’i thënë gjërat në sy”, tha ai.

31/01/2026 12:33- Nis Kuvendi i punës së LDK-së

Ka nisur punimet Kuvendi i Lidhjes Demokratike të Kosovës.

Kryetari i LDK-së, Lumir Abdixhiku i është drejtuar delegatëve me një fjalim rasti.

Në këtë Kuvend të LDK-së pritet të vendoset rreth udhëheqjes së LDK-së, pas rezultateve jo të mira për këtë parti në zgjedhjet e 28 dhjetorit.

31/01/2026 12:25- Myrtezaj: Delegatët vendosin rrjedhën e punimeve, janë tri modalitetet të Kuvendit të LDK-së

Para fillimit të Kuvendit të LDK-se, anëtari i partisë, Valon Myrtezaj tha se ftesa për kuvendin e punës është e paqartë.

Ai theksoi para mediave se i takon delegatë e që të përcaktojnë rrjedhën e punimeve.

Murtezaj tha se kjo është ngjarje shumë e rëndësishme për Lidhjen Demokratike të Kosovës.

“Ftesa nuk është shumë e qartë, janë tre modalitete të takimit të kuvendit të LDK-së, e para mund të jetë takim pune, takim zgjedhor apo mund të ketë votë mos besimi. Siç e keni parë në ftesë nuk është e saktësuar, i takon delegatëve si ranë në këtë kuvend të përcaktojnë rrjedhën e punimeve sot, dhe rrjedhën e LDK-së nesër”, tha ai.

31/01/2026 12:10- Abdixhiku: Do të dëshiroja që kjo ditë të shënohet me maturitet politik, me debate të hapura

Kryetari i Lidhjes Demokratike të Kosovës, Lumir Abdixhiku para se të hynte në mbledhjen partisë, saktësisht në Kuvendin e punës së LDK-së tha se do të dëshironte që kjo ditë të shënohet me maturitet politik, me diskutime dhe debate të hapura.

Abdixhiku thekoi se le të jetë kjo një standard i mirë, i mbarë jo vetëm për LDK-në, por edhe për partitë tjera.

“I siguroj të gjithë anëtarësinë e LDK-së se nga kjo ditë do të dalim edhe më të unifikuar, më të fortë, edhe më të gatshëm për të ardhmen e mirë që na pret përpara”, tha ai.

31/01/2026 12:08- Selmanaj: Mungesa e një agjende të qartë nuk është shenjë e mirë - Hoti vlerë e madhe për LDK-në

Anëtari i Kuvendit të Lidhjes Demokratike të Kosovës (LDK), Driton Selmanaj, ka theksuar se LDK-ja, edhe në momentet e saj më delikate, ka ditur të gjejë mekanizma të brendshëm për rregullim dhe reflektim të drejtë, veçanërisht në situatat kur është përballur me sfida në zgjedhjen e kryetarit të partisë.

“Gjithmonë LDK-ja e ka zgjedhur situatën më të mirë”, tha ai, duke shtuar se aktualisht mungesa e një agjende të qartë nuk është shenjë e mirë.

Sipas Selmanajt, deri mbrëmë duhej të ishte e qartë nëse do të votohej për votëbesim apo do të shqyrtohej dorëheqja.

Duke folur për udhëheqjen e partisë, Selmanaj vlerësoi lart të kaluarën dhe trashëgiminë politike të Avdullah Hotit, duke e cilësuar atë si një vlerë të madhe për LDK-në, por theksoi se kjo nuk përjashton kandidaturat e tjera.

31/01/2026 15:55- Rukiqi kundër dorëheqjes së Abdixhikut

31/01/2026 11:52- Gashi: Kryetari Abdixhiku ka kërkuar që të bëhet vlerësimi i punës së tij

Anëtari i Lidhjes Demokratike të Kosovës (LDK), Arben Gashi, ka deklaruar se për momentin po mbahet një kuvend pune i LDK-së, të cilin e ka cilësuar si një ditë të demokracisë brenda partisë, duke shprehur pritjet që procesi të zhvillohet dhe të përfundojë në këtë frymë.

Sipas Gashit, çështja e votëbesimit apo dorëheqjes së kryetarit të LDK-së mbetet në diskrecion të vetë kryetarit.

Ai theksoi se aktualisht partia nuk ndodhet në fazën e kandidaturave të reja, por në një proces që lidhet me vlerësimin e punës së kryetarit aktual.

“Jemi në një fazë të një procesi që ka të bëjë me vlerësimin e punës së kryetarit aktual, i cili është kërkuar nga vetë ai. Kryetari ka kërkuar që të vlerësohet puna e tij dhe të shihet se çfarë po i ofron kuvendit”, ka deklaruar Gashi.