Kurti për Nishanin: Me maturi e urtësi politike punoi për shtetin modern shqiptar

Edhe kryeministri Albin Kurti ka ngushëlluar për vdekjen e ish-presidentit të Shqipërisë, Bujar Nishani.

Kurti tha se Nishani do të kujtohet për kontributin e tij në karrierën profesionale si ushtarak e pedagog, deputet e ministër.

“Jam thellësisht i pikëlluar nga lajmi për ndarjen nga jeta të ish Presidentit të Republikës së Shqipërisë, Bujar Nishani. Gjatë mandatit të tij si President i Republikës së Shqipërisë, me maturi e urtësi politike punoi për shtetin modern shqiptar”.

Tutje tha se Nishani me vetëdije të lartë kombëtare u angazhua në intensifikimin e marrëdhënieve vëllazërore mes Shqipërisë e Kosovës.

Lexo po ashtu Vdes ish-presidenti i Shqipërisë, Bujar Nishani

Kurti shtoti se është mirënjohës ndaj tij edhe për dhënien e shtetësisë shqiptare.

“Nishani dha mbështetje të pakursyer për Republikën e Kosovës dhe bashkatdhetarët tonë kudo. I jam mirënjohës për dhënien e shtetësisë shqiptare gjatë mandatit të tij”.

“Në këto ditë të vështira për familjen, në emër të Qeverisë së Republikës së Kosovës dhe në emrin tim, u shpreh ngushëllimet më të sinqerta zonjës Odeta për humbjen e bashkëshortit, Ersit dhe Fionës për babain, dhe mbarë kombit shqiptar për Presidentin e shtetit tonë amë”, shkroi Kurti./Telegrafi/