Kryeministri në detyrë, Albin Kurti pas përfundimit të takimit me presidentin Hashim Thaçj tha se në këtë takim kanë shprehur bindjen se Kushtetuta e Kosovës nuk krijon mundësi në kontekstin aktual politik të ketë qeveri të re, pa Kuvend dhe zgjedhje të reja.
Kurti, i cili ishte i shoqëruar në takim me dy këshilltarë ligjor tha se në këtë takim kanë shprehur qëndrimin që besojnë se është i drejtë dhe i vetmi në bazë të Kushtetutës, se nuk mund të kalohet dikur tjetër duke e shpërfillur nenin 82, pikën 2 të Kushtetutës, që thotë se pas një mocioni të mosbesimit ajo që ngelet është të shkohet në zgjedhje.
Sipas tij, presidenti Thaçi u zotua se do ta respektojë Kushtetutën, ligjin dhe praktikat e mëhershme, raporton Telegrafi.
Ai tha se edhe në vitin 2010 edhe 2017 me mocion mosbesimi të suksesshëm ka ra qeveria dhe më pas është shpërndarë Kuvendi dhe janë shpallë zgjedhjet.
Kryetari i VV-së theksoi se presidenti nuk duhet të merret me emra njerëzish e partish, por me data për zgjedhje të reja në kalendarin e këtij viti.
“Ne e theksuam këtë qëndrim tonin që presidenti nuk do të duhej të merrej me emra njerëzish e partish por data për zgjedhjet e reja në kalendarin e këtij vitit. E dimë që ndodhemi në betejën intesive kundër virusit korona dhe mbase kjo do të mund ta shtyjë ca datën e zgjedhjeve, mirë Kushtetuta e Kosovës besojmë që nuk krijon mundësi dhe apo alternativa tjera”, tha ndër të tjera Kurti.
Kryeministri në detyrë, njëherësh kryetar i Vetëvendosjes tha se jashtë nenit 82 të Kushtetutës dhe jashtë COVID-it do të diskutojnë vetëm me shkrim në mënyrë që të mos ketë hapësirë për keqkuptime.
Ndryshe, në këtë takim përveç situatës politike është folur edhe për punën që po bëhet për parandalimin e përhapjes së pandemisë COVID-19. /Telegrafi/
