Kurti përballet me Vuçiqin në KS të OKB-së në New York

Ministrja e Jashtme, Donika Gërvalla, ka bërë njoftuar se bashkë me kryeministrin Albin Kurti, kanë udhëtuar në SHBA.

Përmes një shkrimi në Facebook, Gërvalla tha se në Këshillin e Sigurimit të OKB-së do të ballafaqohen me Aleksandar Vuçiq dhe sulmet, gënjeshtrat, propagandën e tij ndaj Kosovës, qytetarëve dhe institucioneve të saj.

Ministrja hodhi kritika ndaj opozitës, duke thënë se paska zgjedhur pikërisht ditën e sotme për të debatuar rreth Ministrisë së Punëve të Jashtme dhe Diasporës, duke refuzuar propozimin për shtyrje të kësaj pike të rendit të ditës deri në seancën e ardhshme.

“Meqenëse detyra ime ma kërkon që sot të jem në Nju Jork dhe nga pamundësia që të jem e pranishme në atë seancë të Kuvendit, dua të përcjell mesazhin që jo vetëm që nuk i shmangem asnjë debati dhe asnjë hetimi, por mezi po pres që të flasim edhe për keq menaxhimin e parasë publike edhe për punësimet e jashtëligjshme, familjarizimin dhe shkeljet konstante të ligjit në këtë ministri. Mezi po pres”, shprehet Gërvalla.

Tutje thotë se gjatë këtyre viteve të qeverisjes, si ministri e Jashtme kanë vënë në binarë të duhur kontrollin e financave dhe parasë publike si dhe llogaridhënien në çdo fushë.

“Duke mos dashur të merremi me të kaluarën, si qeveri e re kemi kryer reformën më të thellë në këtë institucion të rëndësishëm të Republikës, duke vendosur në çdo segment si kriter të vetëm ligjin, profesionalizmin dhe meritokracinë dhe duke vënë në binarë të duhur kontrollin e financave dhe parasë publike si dhe llogaridhënien në çdo fushë, si brenda ministrisë, ashtu edhe në misionet tona diplomatike jashtë vendit”, theksoi Gërvalla.

Ministrja tha se mezi pret që të flasë në Kuvend për çështje të ndryshme, duke shtuar se “ka vdekur koha e pazareve dhe emërimeve të ambasadorëve dhe konsujve nëpër kafene, telefonata të stilit pronto dhe në oda, të shpenzimeve marramendëse për udhëtime dhe hotele, të shitjes së pasaportave nëpër stacione trenash dhe pika karburanti, të sorollatjes me pasaporta dhe targa diplomatike dhe lloj-lloj malli nëpër ato vetura, të tonit harbut ndaj qytetarëve nëpër konsullata”.

“Qytetarët e Republikës së Kosovës meritojnë të dinë se nga kush dhe si janë përfaqësuar vite me radhë jashtë vendit”, shkroi Gërvalla./Telegrafi/