​Kurti: Bashkëpunimi Kosovë-Shqipëri ka rëndësi historike të pazëvendësueshme

Kryetari i Lëvizjes Vetëvendosje, Albin Kurti ka pritur në një takim pune ambasadorin e Shqipërisë në Kosovë, Qemajl Minxhozi.

LVV bën të ditur se në takim është diskutuar për situatën politike dhe menaxhimin e pandemisë COVID-19.

“Në këtë takim u fol për situatën politike dhe gjendjen e përkeqësuar të shëndetit publik si rezultat i përhapjes eksponenciale të COVID-19 në javët e fundit. Kosova, nga një histori suksesi në menaxhimin e pandemisë shpejt ka rrëshqitur në grupin e vendeve të cilat po përjetojnë përkeqësim të përshpejtuar të situatës. Kjo kërkon vëmendje prioritare, planifikim dhe guxim për ndërhyrje që sigurojnë menaxhim dhe luftim efikas të pandemisë. Në këtë drejtim, u fol për rëndësinë dhe nevojën për bashkëpunim mes dy vendeve përballë kësaj sfide”, thuhet në njoftimin e LVV-së, përcjell Telegrafi.

Më tej në njoftim thuhet se bashkëpunimi mes Kosovës dhe Shqipërisë ka rëndësi historike të pazëvendësueshme.

“Ai duhet të shtrihet në shumë rrafshe, duke filluar nga ai bilateral ekonomik, me qëllim rritjen e qarkullimit të mallrave dhe prodhimeve. Pas goditjes që pandemia i ka dhënë ekonomive tona, nevoja për ta shtuar bashkëpunimin është bërë e domosdoshme, ishte përshtypja që ndanë Kryetari Kurti dhe ambasadori Minxhozi në këtë takim”, përfundon njoftimi./Telegrafi/