Kryetari i FFK-së, Agim Ademi: Nëse na ndodhë të suspendohemi nga FIFA do ta kemi shumë të vështirë rikthimin

Kryetari i Federatës së Futbollit të Kosovës, Agim Ademi, tha se me qëllim të ruajtjes së institucioneve të Kosovës nuk i është drejtuar FIFA-s dhe UEFA-s për t’u thënë se po bëhen ndërhyrje politike në futboll.

Ai shtoi se kjo nuk do të thotë se nuk do ta bëjë as në të ardhmen.

“Nuk e kam përdorur kërkesën e FIFA-s dhe UEFA-s që t’ju shkruaj se po bëhen ndërhyrje politike e gjëra tjera, jam duke i ruajtur institucionet tona deri në fund, deri kur nuk kam ku me shku, por pastaj dal te pjesa ndërkombëtare dhe nëse vjen puna deri atje nëse ka ndërhyrje do ta bëj”, ka thënë Ademi në Rubikon – Klan Kosova.

Ademi shtoi se këto dy institucione të futbollit vazhdimisht përjashtojnë ekipe për shkak të ndërhyrjeve politike, apo arsye të ngjashme dhe nëse kjo i ndodhë Kosovës rikthimi do të jetë i vështirë.

“Nëse neve na ndodhë që Federata e Futbollit të suspendohet, vetëm suspendohet, jo përjashtohet,  garantoj që e kemi shumë të vështirë rikthimin, në momentin që e dërgoj një letër që kemi ndërhyrje politike sigurisht ata përzihen, kur përzihen nuk e di çka ndodhë, më nuk është në dorën tonë”, nënvizoi Ademi.