Kryeministrja italiane e përshkruan propozimin rus për paqen në Ukrainë si “propagandë”

Kryeministrja e Italisë e përshkroi propozimin e presidentit rus, Vladimir Putin, për paqen në Ukrainë si “propagandë”.

“Unë besoj se kjo ka të bëjë më shumë me propagandën sesa një propozim të vërtetë dhe të shëndoshë për negociata”, tha Giorgia Meloni në një konferencë shtypi për të shënuar mbylljen e samitit të G7 të mbajtur në qytetin juglindor të Italisë, Borgo Egnazia.

Ajo theksoi rëndësinë që Ukraina të ruajë integritetin e saj territorial.

Bëhet e ditur se Putin i ofroi Ukrainës paqen me katër kushte: Ukraina të tërheqë trupat e saj nga rajonet Donetsk, Luhansk, Kherson dhe Zaporizhzhia, të pajtohet me përfitimet territoriale të Rusisë, të konfirmojë statusin e saj neutral dhe të anulojë të gjitha sanksionet anti-ruse nga Perëndimi, shkruan AA, përcjell Telegrafi.

Si Ukraina ashtu edhe Perëndimi e hodhën poshtë propozimin si “jorealist”.

Ndërkohë, udhëheqësit e vendeve të G7 – përkatësisht SHBA-ja, Gjermania, Franca, Britania e Madhe, Italia, Kanadaja, Japonia dhe Bashkimi Evropian, nisën një samit tre-ditor në qytetin Borgo Egnazia të Italisë.

Udhëheqës të tjerë botërorë të ftuar nga Italia morën pjesë gjithashtu në samit, duke përfshirë presidentin turk, Recep Tayyip Erdogan dhe kryeministrin indian, Narendra Modi.

Meloni u zotua gjithashtu për përpjekje të vazhdueshme për të gjetur një zgjidhje për konfliktin në Lindjen e Mesme.

“Tani ajo që duhet të bëjmë është të punojmë për paqen dhe kjo është pikërisht ajo që po bëjmë. Dhe për të punuar për paqen duhet të dialogojmë dhe duhet të njohim të drejtën e Izraelit për të qenë i sigurt dhe për të jetuar në paqe, dhe të drejtën e palestinezëve për të pasur shtetin e tyre”, vuri në dukje kryeministrja. /Telegrafi/