KRU “Hidrodrini” në Istog, intervenon në rrjetin e ujësjellësit dhe kanalizimit

Kompania e Ujësjellësit dhe Kanalizimit “Hidrodrini” në Istog ka kryer një sërë intervenimesh të rëndësishme për të përmirësuar dhe mirëmbajtur furnizimin me ujë dhe rrjetin e kanalizimeve.

Ekipet operative janë angazhuar çdo ditë për të riparuar defektet në rrjetet e ujësjellësit dhe kanalizimit, duke reaguar ndaj raportimeve të konsumatorëve dhe problemeve të identifikuara nga vetë kompania.

Nëpërmjet rrjetit social Facebook, kompania ka bërë të ditur për ndërhyrjet kryesore në të cilat janë duke intervenuar.
“Kontraktorët po punojnë sipas planit dinamik për bartjen e lidhjeve në gypat e rinj në fshatin Tomoc dhe Gurrakoc. Po ashtu, po punohet në rrethojat e rezervarëve në Zhakovë dhe në Shushicë, si dhe në Banjë në rehabilitim të rrjetit. Riparime janë realizuar dhe po vazhdojnë edhe në rrjetin e kanalizimit”, kanë shkruar ata ndër të tjera.

Gjithashtu sipas tyre për shkak të mungesës së ujit nga burimet e Bjeshkës, ekipe të tjera janë duke monitoruar dhe kontrolluar rrjetin për të identifikuar dhe ndaluar humbjet e ujit, me qëllim sigurimin e një furnizimi më të qëndrueshëm për konsumatorët.